जेन–जी आन्दोलनको क्रममा पोखराको वरपिपल रिसोर्टमा तोडफोड र आगजनी गराएको आरोपमा पाँच जना पक्राउ परेका छन्। कास्की प्रहरीले उपद्रवको प्रमुख योजनाकार भन्दै उनीहरूलाई सार्वजनिक गरेको हो।

पक्राउ पर्नेहरू:

रुपक नेपाली (२९), घारीपाटन

खड्कबहादुर थापा (४२), पोखरा–१८

खुमराज गुरुङ (३२)

नवराज खड्का (४७)

एलिसा गुरुङ (२७)

कास्की प्रहरी प्रमुख एसपी नवीन कार्कीका अनुसार, यी पाँचै जना जेन–जी आन्दोलनका आधिकारिक अभियन्ता होइनन्, तर आन्दोलनकै भीडलाई उक्साएर रिसोर्टमा हमला गराएको प्रमाण भेटिएको छ।

प्रहरीका अनुसार २९ वर्षीय रुपक नेपालीले भीडलाई—
“यो रिसोर्ट प्रचण्डको लगानी भएको हो, जलाऊ!”
भन्दै तोडफोड तथा आगजनी गराउन नेतृत्व गरेका थिए।

तर प्रहरीले पुष्टि गरेको छ— रिसोर्टमा प्रचण्ड (पुष्पकमल दाहाल) को कुनै लगानी छैन।
रिसोर्ट लमजुङका जितु नामका व्यक्तिको रहेको खुलेको छ।

यति ठूलो भ्रम फैलाएर भीड उद्देलित गरिएको प्रहरीले ठहर गरेको छ।

पक्राउ परेकामध्ये खड्कबहादुर थापा पोखरा–१८ का होटल व्यवसायी हुन्।
अनुसन्धानमा खुमराज गुरुङ, नवराज खड्का र एलिसा गुरुङ पनि सक्रिय रूपमा तोडफोडको घटनामा संलग्न भएको प्रमाण भेटिएको छ।

रुपक नेपालीले पोखरा रंगशालामा प्रशिक्षण दिने कामसमेत गर्दै आएको तथ्य फेला परेको छ।

प्रहरीका अनुसार, रिसोर्टमै काम गर्ने केही व्यक्तिहरू आन्दोलनकै दिन भीडसँग मिसिएर तोडफोड र आगजनीमा सहभागी भएका थिए।
कास्की प्रहरीले उनीहरूको विवरण पनि संकलन गरेको छ।

एसपी नवीन कार्की भन्छन्—

“यो घटनामा संलग्न व्यक्तिहरू जेन–जीका अभियन्ता होइनन्। योजनाबद्ध रूपमा रिसोर्टमाथि आक्रमण गराइएको छ। आपराधिक उपद्रवमा अनुसन्धान अगाडि बढेको छ।”

प्रहरीका अनुसार घटनास्थलका भिडियो, सामाजिक सञ्जालका लाइभहरू, प्रत्यक्षदर्शीका बयान र सीसीटीभीकै आधारमा यो समूह पहिचान गरिएको हो।