काठमाडौं । केन्द्रीय अनुसन्धान ब्युरो (CIB) ले यति समूहसँग सम्बन्धित बहुचर्चित दरबारमार्गको जग्गा प्रकरणमा नेपाल ट्रस्टका तत्कालीन सहसचिव लेखबहादुर कार्की (66) लाई पक्राउ गरेको छ।

CIB ले शुक्रबार सार्वजनिक गरेको विज्ञप्तिअनुसार, नेपाल ट्रस्टको नाममा दर्ता रहेको दरबारमार्गस्थित कित्ता नम्बर 4606 र त्यससँगै कित्ता नम्बर 4605 समेत थामशेर्कु ट्रेकिङ प्रालि (यति समूहअन्तर्गत) लाई अनियमित रूपमा लिज दिने विषयमा ठगी तथा आपराधिक विश्वासघातसम्बन्धी अनुसन्धान चलिरहेका बेला कार्की पक्राउ परेका हुन्।

कार्की चितवन, भरतपुर–१५ बसोबास गर्दै आएका थिए।
CIB का अनुसार, अब यस प्रकरणमा संलग्न अन्य व्यक्तिहरूको पनि पहिचान भइसकेको छ र उनीहरूलाई पनि छिट्टै पक्राउ प्रक्रियामा ल्याइनेछ।

CIB को विज्ञप्तिअनुसार–

नेपाल ट्रस्ट सञ्चालक समितिको औपचारिक निर्णयबिना

वदमियतपूर्वक

नेपाल ट्रस्टलाई दीर्घकालीन हानि हुने गरी

२०७४ असार १४ गते सम्झौता गरी थामशेर्कुलाई लिज दिइएको ठहरिएको छ।

यस प्रक्रियामा सरकारी पदमा रहेका व्यक्तिहरू, कर्मचारी तथा बाह्य व्यक्तिहरूले मिलेमतो गरी अवैध लाभ उठाएको अनुसन्धानले देखाएको CIB ले जनाएको छ।

CIB को भनाइअनुसार, लिज सम्झौताबाट नेपाल ट्रस्टमार्फत नेपाल राष्ट्रलाई ठूलो आर्थिक नोक्सानी पुगेको छ।

यस प्रकरणमा सहयोगी, मतियार र त्यसबेला प्रभावशाली पदमा रहेका व्यक्तिहरूले अवैध र व्यक्तिगत लाभ उठाएको पनि उल्लेख छ।