काठमाडौँ — नेकपा एमालेनिकट राष्ट्रिय युवा संघ नेपालले काठमाडौँ महानगरपालिकाका मेयर **बालेन्द्र साह (बालेन)**विरुद्ध साइबर ब्युरोमा उजुरी दर्ता गरेको छ।
युवा संघका केन्द्रीय उपाध्यक्ष महाराज गुरुङले बिहीबार साइबर ब्युरोमा उजुरी दर्ता गराएका हुन्।
गुरुङद्वारा दर्ता गरिएको उजुरीमा बालेनले आफ्नो आधिकारिक फेसबुक आईडी ‘Balen’ मार्फत विदेशी राष्ट्र,विभिन्न राजनीतिक दल,सार्वजनिक पदधारी व्यक्तिहरूप्रति आपत्तिजनक शब्द, गालीगलौज र अपमानजनक अभिव्यक्ति प्रयोग गरी सार्वजनिक शान्ति भंग गरेको आरोप लगाइएको छ।
उक्त पोस्टले सामाजिक सद्भाव र भाइचारा बिगार्ने संकेत दिएको भन्दै उजुरीमा आपत्ति जनाइएको छ। युवा संघले दाबी गरेको छ कि मेयर जस्तो सार्वजनिक हैसियतमा रहेका व्यक्तिबाट यस्तो अभिव्यक्ति आउनु देशको सामाजिक प्रतिष्ठामाथि गम्भीर प्रहार हो।
उजुरीमा बालेनका ती अभिव्यक्तिका स्क्रिनसट, सो सम्बन्धी मिडिया रिपोर्ट, विभिन्न समाचार स्रोतका सामग्री प्रमाणका रूपमा संलग्न गरिएको छ।
गुरुङले भने— “उजुरीमा उल्लिखित सबै आपत्तिजनक शब्द र अभिव्यक्तिका हुबहु स्क्रिनसटहरू प्रमाणका रूपमा पेश गरेका छौँ।”
उजुरीमा बालेनमाथि तीन प्रकारका कानुनी कसुर दाबी गरिएका छन्—
सार्वजनिक शान्ति विरुद्धको कसुर
गाली–बेइजतीसम्बन्धी कसुर
साइबर अपराधसम्बन्धी कसुर
उजुरीमा बालेनमाथि कडा अनुसन्धान गरी पक्राउ गर्न र प्रमाण नष्ट हुन नदिन राहदानी रोक्का राख्न समेत माग गरिएको छ।
युवा संघका अनुसार, सार्वजनिक पदमा बसेको व्यक्तिबाट विदेशी राष्ट्र र दलप्रति अपमानजनक पोस्ट आउनु अन्तर्राष्ट्रिय सम्बन्ध र राजनीतिक संस्कृतिमाथि नकारात्मक असर पार्ने विषय भएकाले कडाभन्दा कडा कारबाही आवश्यक छ।
प्रतिक्रिया
सम्बन्धित खवर
