काठमाडौं ।

अभिनेता केदार घिमिरे ‘माग्ने बुढा’ सामाजिक सञ्जालमा गरेको एउटा पोस्टका कारण विवादमा परेका छन्।

३ कात्तिकमा उनले फेसबुकमा एउटा फोटो पोस्ट गरेका थिए — जसमा ट्राफिक प्रहरीले हेलमेट लगाएका दुई युवायुवतीलाई रोकेर सोधपुछ गर्दै गरेको दृश्य देखिन्थ्यो।
फोटोसँगै उनले क्याप्सन लेखेका थिए —

“दुबैजनाले हेलमेट लगाउँदा पनि रोक्नुको कारण के हुनसक्छ? अनुमान लगाउनुस।”

उनले ‘#ट्राफिकनियमपालनागरौं’ र आफू अभिनित चलचित्र ‘#JerryOnTop’ ह्यासट्याग पनि प्रयोग गरेका थिए।

तर केही समयमै उक्त फोटो सामाजिक सञ्जालमा भ्रामक रूपमा फैलियो।
धेरै पेज र व्यक्तिहरूले त्यसलाई गलत सन्दर्भमा प्रयोग गर्दै,

“धरानमा ट्राफिकले आफ्नी श्रीमतीलाई अर्कैको मोटरसाइकलमा भेटे”
भन्ने जस्ता झूटा दाबीहरू गर्दै पोस्ट सेयर गर्न थाले।

यसपछि, माग्ने बुढाले पोस्टबारे स्पष्ट पार्दै सार्वजनिक माफी मागेका छन्।
उनले लेखेका छन् —

“म जनचेतनामूलक सन्देशका लागि मात्र फोटो पोस्ट गरेको थिएँ। यसबाट कसैको मानमर्दन भएकोमा म क्षमाप्रार्थी छु।”

घिमिरेको पोस्टमा सयौं प्रतिक्रिया आएका छन्।
एक प्रयोगकर्ता थोमस तेजुले लेखेका छन् —

“समाजमा त्यसको प्रभाव के पर्छ भन्ने हेक्का नहुनेले किन बाठो पल्टिनु? कलाकारिता ठिक छ, हर्कत अलि बढी भयो।”

त्यस्तै, कृष्ण ढकाल लेख्छन् —

“अरुको फोटो प्रयोग गरेर फिल्म प्रचार गर्नु शोभनीय होइन। अनुमति बिना फोटो खिच्नु साइबर अपराध पनि हुन सक्छ।”

केदार घिमिरेको माफीपछि विवाद केही शान्त भएको भए पनि, यस घटनाले सामाजिक सञ्जालमा जिम्मेवार व्यवहार आवश्यक छ भन्ने सन्देश फेरि स्मरण गराएको छ।