सुनसरी । इनरुवा नगरपालिका–६ का वडाध्यक्ष सुमन थापाविरुद्ध अङ्गभङ्गसम्बन्धी फौजदारी मुद्दा दर्ता भई जिल्ला अदालत सुनसरीले पक्राउ पुर्जी जारी गरेको छ। तर, पुर्जी जारी भएपछिसमेत उनले वडाध्यक्षकै हैसियतमा काम गर्दै आएको तथ्य बाहिर आएको छ।

२०८१ फागुन २२ गते साँझ थापाले चलाएको बा २१ च ६८८८ नम्बरको निशान कारले ठक्कर दिँदा मोटरसाइकलमा पछाडि बसेकी देविका खनाल गम्भीर घाइते भएकी थिइन्। उनी हालसम्म उपचाररत रहेकी छन्।

पीडित पक्षले पटक–पटक जाहेरी दर्ता गर्न खोज्दा प्रहरीले अस्वीकार गरेको र उच्च अदालत विराटनगरको आदेशपछि मात्र मुद्दा दर्ता भएको अधिवक्ता वसन्त सुवेदीले बताए। अदालतको आदेशपछि मात्रै प्रहरी सक्रिय भई साउन १६ गते मुद्दा दर्ता र साउन २० गते थापाविरुद्ध पक्राउ पुर्जी जारी भएको हो।

कानुनअनुसार फौजदारी मुद्दा दर्ता भई पुर्जी जारी भएलगत्तै सार्वजनिक पद धारण गरेका व्यक्तिको पद निलम्बन हुने व्यवस्था छ। तर, थापाले भदौ ८ गतेसम्म वडाध्यक्षकै रूपमा कार्यालय सञ्चालन गरेका थिए। त्यसपछि मात्र उनले वडा सदस्य कृष्ण श्रेष्ठलाई कार्यवाहकको जिम्मेवारी दिएका थिए।

जिल्ला प्रहरी प्रमुख सुमनकुमार तिम्सिनाले थापाविरुद्ध मुद्दा दर्ता भएको पुष्टि गर्दै उनको पदबारे प्रशासनसँग पत्राचार भएको जानकारी दिए। तर, नगर प्रमुख केदार भण्डारी र प्रमुख प्रशासकीय अधिकृत डिल्लीराज निरौलाले भने अहिलेसम्म कुनै औपचारिक जानकारी प्राप्त नभएको प्रतिक्रिया दिएका छन्।

पीडित पक्षले जाहेरी दर्तामा ढिलाइ र पुर्जी जारी भएपनि तत्कालीन पक्राउ नगरेको घटनाले प्रहरीको निष्पक्षतामाथि प्रश्न उठाएको आरोप लगाएको छ। उच्च राजनीतिक दबाबका कारण तत्कालीन समयमा कारबाही गर्न नसकेको बतईएको छ ।उनि नेपाली काँग्रेस बाट निर्बाचित वडाध्यक्ष हुन् ।