काठमाडौँ – नेपाली कांग्रेस निकट गुन्डा भनेर चिनिएका गोपाल मोक्तान उर्फ रेस लामा पुनः पक्राउ परेका छन्। पटक–पटक पक्राउ परे पनि राजनीतिक संरक्षणकै कारण उनलाई सजाय भन्दा ‘बचाइँदै आएको’ आरोप लाग्ने गरेको छ।

दोलखाको बैतेश्वर गाउँपालिका–३ स्थायी घर भई हाल काठमाडौँ सुकेधारा बस्दै आएका लामालाई आइतबार साँझ प्रहरी वृत्त गौशालाबाट खटिएको टोलीले चाबहिलस्थित एवान क्याफे बाट पक्राउ गरेको हो।

उनीमाथि भदौ ४ गते बत्तिसपुतलीस्थित बाजेको सेकुवामा एकराज कार्की ‘जनक’ लाई कुटपिट गरेको आरोप छ। जनकले तिर्नुपर्ने २ लाख ८० हजार माग्दा उल्टै रेसले आफूमाथि आक्रमण गरेको पीडितको दाबी छ। जाहेरीको आधारमा प्रहरी वृत्त गौशालाले अभद्र व्यवहारसम्बन्धी कसुरमा अनुसन्धान अघि बढाएको छ।

यो पहिलो पटक भने होइन। २०८१ माघ २४ मा उनले तरबार र खुकुरीले केक काट्दै टिकटकमा भिडियो सार्वजनिक गरेका थिए। सार्वजनिक ठाउँमा हतियार प्रदर्शन गर्दै ‘आतङ्क मच्चाएको आरोप’मा उनीसहित रोमन मगर, सुमन पराजुली, मनोहर थापा मगर, रोनिस बरामु, रोशन तामाङ र गुनबहादुर गुरुङलाई उपत्यका अपराध अनुसन्धान कार्यालयले पक्राउ गरेको थियो।

स्थानीयहरूका अनुसार, आफूलाई रेस लामा भनेर चिनाउने मोक्तान बागमती प्रदेशका नेपाली कांग्रेस सांसद कुन्दनराज काफ्ले निकट मानिन्छन्। यही राजनीतिक संरक्षणकै कारण उनी पटक–पटक पक्राउ पर्न छाडेको तर सजाय पाउन नसकेको आरोपसमेत लागेको छ।

यसैबीच, प्रहरी अधिकारीहरूले घटनाबारे थप अनुसन्धान भइरहेको र आवश्यक प्रमाण संकलन भइरहेको बताएका छन्।