काठमाडौं ।बलिउड अभिनेता गोविन्दा र उनकी पत्नी सुनिता आहुजाबीच सम्बन्धविच्छेदको मुद्दा दर्ता भएको खबर सार्वजनिक भएको छ ।

भारतीय सञ्चारमाध्यमहरूका अनुसार, सुनिताले बान्द्रा फेमिली कोर्टमा निवेदन दिएकी छन् । उनले गोविन्दामाथि अन्य महिलासँग शारीरिक सम्बन्ध राखेको र व्यवहारमा क्रूरता देखाएको आरोप लगाएकी छन् ।

रिपोर्टअनुसार, सुनिताले हिन्दू विवाह ऐन १९५५ को धारा १३(१)(आई), (आईए), (आईबी) अन्तर्गत डिभोर्स निवेदन दिएकी हुन् । पारिवारिक अदालतले गत मे २५ मा गोविन्दालाई अदालतमा उपस्थित हुन आदेश दिएको थियो । तर अहिलेसम्म गोविन्दा अदालतमा नपुगेको र सुनिता भने निरन्तर उपस्थित हुँदै आएकी बताइएको छ ।

गोविन्दाको निकट स्रोत र उनका म्यानेजरले भने यी सबै समाचारलाई अफवाह भएको बताएका छन् । “डिभोर्सबारे आएका रिपोर्टहरू आधारहीन छन्,” उनको म्यानेजरलाई उद्धृत गर्दै भारतीय मिडियाले उल्लेख गरेका छन् ।

तर भारतको प्रतिष्ठित पत्रिका द इण्डियन एक्सप्रेस ले पनि सुनिताले सम्बन्धविच्छेदको निवेदन दर्ता गरेको पुष्टि गरेको छ ।

६ महिना अगाडि पनि उनीहरूबीच सम्बन्धविच्छेद हुने चर्चा चलेको थियो । त्यतिबेला गोविन्दाको एक मराठी अभिनेत्रीसँग अफेयर रहेको खबर बाहिर आएको थियो । तर त्यसबेला पनि सुनिताले अन्तर्वार्तामार्फत सम्बन्धविच्छेद नगर्ने स्पष्ट पारेकी थिइन् ।

हालै भ्लगिङ सुरु गरेकी सुनिताले आफैं पनि भिडियोमा विवाह जीवनबारे भावुक हुँदै कुरा गरेकी छिन् । उनले भनिन्,
“जब मैले गोविन्दालाई भेटेँ, आमालाई भनेकी थिएँ कि म उनीसँग विवाह गर्छु र जीवन राम्रोसँग चल्छ । आमाले मेरो सपना पूरा गरिदिनुभयो, बच्चाहरू भए । तर सम्बन्धमा उतारचढाव आउँछ । अझै पनि मलाई विश्वास छ कि माँ कालीले मेरो परिवारलाई जोगाउनुहुन्छ ।”

अदालतमा मुद्दा विचाराधीन रहेकाले अन्तिम निर्णय आउन बाँकी छ । तर, बलिउडको चर्चित जोडीमाथि आएको यो समाचारले फेरि एकपटक उनीहरूको वैवाहिक जीवनलाई चर्चाको केन्द्रमा ल्याएको छ ।