काठमाडौं ।नक्कली शैक्षिक प्रमाणपत्र प्रकरणमा पक्राउ परेका रास्वपा बागमती प्रदेश प्रशिक्षण विभागका संयोजक हरिप्रसाद कँडेललाई पार्टीले तत्काल निलम्बन गरेको छ ।

रुपन्देही प्रहरीले कँडेललाई साउन ३० गते पक्राउ गरेको थियो । उनको संलग्नताबारे प्रहरीले अनुसन्धान गरिरहेकै अवस्थामा रास्वपाको केन्द्रीय अनुशासन आयोगले उनलाई कुनै पनि जिम्मेवारीमा नरहने गरी निलम्बन गर्ने निर्णय गरेको हो ।

आयोगका कार्यवाहक प्रमुख रमाकान्त रिमालले पठाएको पत्रमा भनिएको छ–
“नक्कली शैक्षिक प्रमाणपत्र छपाइमा संलग्न भई पक्राउ परेका सूचनाको आधारमा अनुसन्धानमा सहजता होस् भन्ने उद्देश्यका साथ तपाईँलाई पार्टीको कुनै जिम्मेवारीमा नरहने गरी निलम्बन गरिएको जानकारी गराइन्छ ।”

यसअघि अन्य दलका नेताहरू विवादमा मुछिँदा, पार्टीहरूले प्रायः “काखी च्याप्ने” रणनीति अपनाउने गरेका उदाहरण धेरै छन् ।

तर रास्वपाले आफ्ना नेतामाथि “पहिले अनुसन्धान होस्, पछि निर्णय होस्” भन्ने स्पष्ट सन्देश दिँदै कारबाही गरेको छ ।

राजनीतिक विश्लेषकहरूले रास्वपाको यो कदमलाई “अन्य दलले सिक्नुपर्ने अभ्यास” भन्दै स्वागत गरेका छन् ।

रुपन्देही प्रहरीले बेलहिया बसपार्कस्थित होटल मुक्तिनाथ परिसरबाट भारतको कानपुर निवासी २५ वर्षीय अभिषेक यादवलाई ठूलो मात्रामा नक्कली शैक्षिक प्रमाणपत्रसहित पक्राउ गरेको थियो ।
उनको बयानकै आधारमा कँडेल पक्राउ परेका हुन् ।

यही घटनापछि रास्वपाले अनुशासन देखाएको हो, जसले पार्टीको छवि र राजनीतिक संस्कृतिमा नयाँ बहसको थालनी गरेको छ ।