चर्चित गीत ‘यो गाउँको ठिटो म कान्छा मेरो नाम’ का गीतकार तथा साहित्यकार प्रेमविनोद नन्दनको ९१ वर्षको उमेरमा निधन भएको छ।

उनका भतिजा तथा वामपन्थी नेता केशवलाल श्रेष्ठका अनुसार आइतबार राति ९ः३० बजे चितवन मेडिकल कलेजमा उपचारकै क्रममा उनको निधन भएको हो।

१९९२ सालमा तनहुँको बन्दीपुरमा जन्मिएका नन्दनको वास्तविक नाम प्रेमलाल श्रेष्ठ हो। प्रगतिशील साहित्यकारका रूपमा पहिचान बनाएका उनले नाटक लेखन, निर्देशन र गायनमा पनि योगदान दिएका थिए।

२०११ सालमा व्यवस्थाविरुद्ध ‘झटारो’ कृति प्रकाशन गर्दै साहित्यिक यात्रा सुरु गरेका नन्दनले २०१८ सालदेखि गीत लेखनमा सक्रियता जनाए। उनका शब्दमा तयार भएका धेरै गीत लोकप्रिय छन्।

चलचित्र मोहनी मा शम्भुजीत बास्कोटाको संगीत र उदित नारायणको स्वरमा रहेको ‘यो गाउँको ठिटो म कान्छा मेरो नाम’ आज पनि निकै रुचाइन्छ। त्यस्तै, कर्जा चलचित्रमा रहेको ‘ज्यानको माया नैनारेशम…’ बोलको गीत पनि अत्यधिक लोकप्रिय भयो।

वरिष्ठ संगीत विश्लेषक प्रकाश सायमीका अनुसार नन्दनका गीतहरू नेपाली संगीतको भण्डारमा कहिल्यै नमेटिने गरी अमर छन्। उनले भने, “उहाँको शब्द स्रोतालाई न्याय दिन सक्ने खालको थियो। नन्दन एक अद्वितीय गीतकार तथा साहित्यकार हुनुहुन्थ्यो।”