चितवन ।चितवन प्रहरीले आइतबार दिउँसो भरतपुर र नारायणगढ क्षेत्रका विभिन्न होटलमा आकस्मिक छापा मार्दा २० जना पक्राउ परेका छन्।

जिल्ला प्रहरी कार्यालय चितवनका सूचना अधिकारी डिएसपी रविन्द्र खनालका अनुसार पक्राउ पर्नेमा ११ महिला र ९ पुरुष छन्। तीमध्ये केही होटल सञ्चालक र कर्मचारी पनि रहेका छन्।

प्रहरीका अनुसार दिउँसो ३ बजेदेखि ५ बजेसम्म सञ्चालन गरिएको अपरेसनमा विभिन्न होटलमा यौनजन्य गतिविधि हुँदै आएको आशंकामा छापा मारिएको हो। प्रहरीले नियन्त्रणमा परेकाहरुलाई तत्कालै अनुसन्धानका लागि जिल्ला प्रहरी कार्यालयमा ल्याएको छ।

डिएसपी खनालले भने, “होटलमा अनैतिक गतिविधि भइरहेको भन्ने सूचनाको आधारमा अपरेसन सञ्चालन गरिएको हो। पक्राउ परेकामाथि कानूनी प्रक्रिया अनुसार अनुसन्धान अघि बढाइएको छ।”

प्रहरीले यस्ता गतिविधिमा संलग्न हुनेहरु मात्र नभई होटल सञ्चालक र सहयोग गर्नेहरुलाई समेत कानूनी दायरामा ल्याउने तयारी गरेको जनाएको छ।

स्थानीय बासिन्दाले नारायणगढ र भरतपुर क्षेत्रमा पछिल्ला वर्षहरूमा यस्ता गतिविधि बढेको भन्दै प्रहरीलाई निगरानी कडा बनाउन माग गर्दै आएका थिए। आइतबारको छापा त्यसकै निरन्तरता भएको प्रहरीको भनाइ छ।

हाल पक्राउ परेकाहरूलाई वयहोरा संकलन गर्ने काम भइरहेको र आवश्यक प्रमाण संकलनपछि मात्र आधिकारिक विवरण सार्वजनिक गरिने प्रहरीले जनाएको छ।