काठमाडौं – नेपाली कांग्रेससँग आवद्ध गुन्डा नाइके एबम नेता राजेन्द्रबहादुर गोर्खालीलाई प्रहरीले १० करोड रुपैयाँको चेक बाउन्स प्रकरणमा काठमाडौंबाट पक्राउ गरेको छ।
गोर्खाली चावहिलका स्थायी बासिन्दा भए पनि पछिल्ला वर्षहरूमा उनी सिन्धुपाल्चोक जिल्लामा सक्रिय राजनीतिमा उत्रिएका थिए। प्रारम्भमा नेपाली कांग्रेस र तरुण दलसँग आबद्ध रहे पनि २०७४ सालको निर्वाचनमा उनले राप्रपा प्रवेश गरेका थिए। तर, जनमत कमजोर भएपछि फेरि कांग्रेसमै फर्किएका थिए।
गोर्खालीको राजनीतिक यात्रामा विवादास्पद पृष्ठभूमि जोडिएको छ। करिब २५ वर्षअघि राजधानीको बेबिलोन डिस्कोमा राकेश लिम्बूको हत्या आरोपमा उनी जेल सजाय भुक्तान गरिसकेका छन्। दस वर्ष जेल बसेपछि बाहिर निस्किएका उनी पुनः विभिन्न आपराधिक गतिविधिमा संलग्न हुँदै आएका थिए।
सजाय पूरा गरेर फर्केका गोर्खालीले कांग्रेसको राजनीति गर्न सिन्धुपाल्चोक रोजेका थिए।
कांग्रेसका स्व. विकास लामासँग निकटता बढाउँदै उनले १४औं जिल्ला अधिवेशनमा महाधिवेशन प्रतिनिधि र महासमिति सदस्यमा लोकप्रिय मतसहित विजयी भएका थिए।
प्रतिनिधि सभा–२ बाट उम्मेदवार सिफारिससम्म पुगे पनि गठबन्धनका कारण अन्तिममा टिकट पाउन सकेनन्।
गोर्खालीले सिन्धुपाल्चोकमा जग्गा–घर खरिद, कांग्रेस कार्यालयलाई सहयोग र चुनावमा ठुलो खर्च गर्दै आफ्नो प्रभाव बढाउने प्रयास गरेका थिए।
अहिले भने उनी १० करोड रुपैयाँको चेक बाउन्स प्रकरणमा पक्राउ पर्न पुगेका छन्। प्रहरी स्रोतका अनुसार, गोर्खालीलाई आवश्यक अनुसन्धानपछि अदालतमा उपस्थित गराइनेछ।
प्रतिक्रिया
सम्बन्धित खवर
