धरान – बराहक्षेत्र नगरपालिका–१ मा रहेको मदनभण्डारी राजमार्गअन्तर्गतको दुधपानी खोलाले शुक्रबार दिउँसो बुबा–छोरीलाई बगाउँदा छोरी अझैसम्म फेला परेकी छैनन्।

धरान–१६ का जीवन राई मोटरसाइकलमा १९ वर्षीया छोरी अनितासहित घरतर्फ फर्किँदै गर्दा दिउँसो करिब २ बजे अचानक खोला बढेको भेलमा परेका थिए। तीव्र वेगसहितको पानीले दुबैलाई सप्तकोशीसम्म पुर्‍याए पनि जीवनलाई स्थानीयवासी र सुरक्षाकर्मीले ज्यान जोगाउन सफल भए। तर अनिताको खोजी अझै जारी छ।

घाइते जीवनलाई तत्कालै उद्धार गरी बीपी कोइराला स्वास्थ्य विज्ञान प्रतिष्ठान, धरानमा भर्ना गरिएको प्रहरीले जनाएको छ।

घटनापछि इलाका प्रहरी कार्यालय महेन्द्रनगरका निरीक्षक दिवस कुँवरको नेतृत्वमा १२ जना सुरक्षाकर्मी परिचालन गरेर खोजतलास सुरु गरिएको हो। शनिबार दिनभर घटनास्थलदेखि राजाबाससम्म ‘कायक’ प्रयोग गरेर खोजी कार्य गरिएको भए पनि अनिताको कुनै सुराग भेटिएको छैन।

निरीक्षक कुँवरका अनुसार आइतबारदेखि खोजी क्षेत्र विस्तार गरेर राजाबासदेखि कोशी ब्यारेजसम्म ‘कायक’ मार्फतै खोजतलास चलाइनेछ। हाल कोशीमा पानीको सतह बढेका कारण ठूलो डुङ्गा प्रयोगमा कठिनाइ भएकाले हल्का र छरितो कायकलाई प्राथमिकतामा राखिएको उनले बताए।

“कायकले कुनाकाप्चासम्म पुग्न सजिलो हुन्छ, छिटो पनि हुन्छ,” उनले भने, “अनिता भेटिएपछि मात्र ठूलो डुङ्गा प्रयोगमा ल्याइनेछ।”