१२६ दिनको रुपन्देही कारागार बसाइपछि पनि राष्ट्रिय स्वतन्त्र पार्टी (रास्वपा) का सभापति रवि लामिछाने उही मुस्कान र उही उत्साहसहित उपत्यकामा भित्रिएका छन्। लामिछानेलाई १२६ दिनको रुपन्देही कारागार बसाइपछि शुक्रबार काठमाडौंको नख्खु कारागार स्थानान्तरण गरिएको हो ।

कृष्ण जन्माष्टमीको दिन बिहानै लुम्बिनी प्रदेशको प्रशिक्षण कार्यक्रममा सहभागी हुन पुगेका रास्वपाका नेता मनिष झा र उपसभापति डा. स्वर्णिम वाग्लेले लामिछानेलाई भैरहवा कारागारमै भेट्ने कोसिस गरेका थिए। तर अनुमति नपाएपछि उनीहरूले विमानस्थलको प्रतीक्षालयमै करिब दुई मिनेट लामिछानेसँग भेट्ने मौका पाए।

सेतो सर्ट र खरानी रङको पाइन्ट लगाएर विमानस्थलमा देखिएका लामिछाने उज्यालो अनुहारसहित आत्मविश्वासी देखिएको झाको फेसबुक पोस्टमा उल्लेख छ। छोटो भेटमा लामिछानेले भने,“पुरै नेपाल मेरो घर हो। सबै नेपाली आफन्त हुन्। भैरहवाको आमा–बुवा, दाजुभाइ–दिदीबहिनीप्रति म कृतज्ञ छु। सुरक्षाकर्मी र कारागार प्रशासनले गरेको व्यवस्थापनप्रति पनि आभारी छु।”

उनी अझै स्पष्ट स्वरमा थपे,“राजनीतिक प्रतिशोधले जहाँ पठाए पनि डराउँदिन। अब कृष्ण जन्मिने छैन, जन्मेकाहरूले नै कृष्ण बन्नुपर्नेछ। म जनताको अदालतमा विश्वास गरेर परिवर्तनका लागि सबै त्यागेर हिँडेको मान्छे हुँ।”

भेट छोटो थियो। तर ती दुई मिनेटमै लामिछानेले आफ्नो १२६ दिनको अनुभव, आत्मबल र दृष्टिकोण प्रस्ट पारे। उनले कारागार कोठाको भित्तामा समेत सन्देश लेखेर आएको बताए—“अब कृष्ण जन्मिने छैन। जन्मेकाहरूले नै कृष्ण बन्नुपर्नेछ।”

उनले थपे,“४६३ दिनअघि प्रमाण छ भनेर आरोप लगाइयो। जब मैले प्रमाण मागेँ, बल प्रयोग देखाइयो। न्याय खोज्दा संयन्त्रले प्रतिशोध साध्यो। तर पनि म भयभीत छैन।”

लामिछानेलाई बुद्ध एयरको उडान नम्बर यूए ८६० मार्फत भैरहवाबाट काठमाडौं ल्याइएको हो।