काठमाडौं – समर्थकको भीडतर्फ हात हल्लाउँदै राष्ट्रिय स्वतन्त्र पार्टी (रास्वपा)का सभापति रवि लामिछाने शनिबार दिउँसो ललितपुरको नख्खु कारागार प्रवेश गरेका छन्।

रुपन्देहीको भैरहवा कारागारमा १२६ दिन बिताएका लामिछानेलाई आज बिहानै अड्डासार (स्थानान्तरण) गरिएको हो। उनलाई बुद्ध एयरको उडानमार्फत काठमाडौं ल्याएर नख्खु कारागारको ‘सीआरसी ब्लक’मा राखिएको कारागार प्रशासनले जनाएको छ।

यसअघि सो ब्लकमा रौतहट बम विस्फोटका आरोपी पूर्वमन्त्री अफताब आलम पनि राखिएका थिए। कारागार प्रशासनका अनुसार लामिछानेलाई छुट्टै कोठा उपलब्ध गराइनेछ। “अन्य कैदीबन्दीझैं उहाँलाई पनि सुविधा दिइनेछ। तर, नख्खु कारागार संरचनात्मक हिसाबले भैरहवाभन्दा सहज र सुरक्षित छ,” कारागारका एक अधिकारीले जानकारी दिए।

लामिछानेले रुपन्देही जिल्ला अदालतमा जेठ १४ गते कारागार सरुवाका लागि निवेदन दिएका थिए। अदालतले जेठ १६ गते नै अनुमति दिए पनि तत्काल सरुवा सम्भव नभएको थियो। पछि गृह प्रशासनले नख्खु स्थानान्तरण गर्ने निर्णय गरेपछि आज मात्र कार्यान्वयन भएको हो।

नख्खु कारागार बाहिर लामिछानेलाई देख्न आएका समर्थकहरूले जयघोष गर्दै स्वागत गरेका थिए। लामिछाने पनि हात हल्लाउँदै उनीहरूको अभिवादन स्वीकार गर्दै कारागार परिसरभित्र प्रवेश गरे।