गुण्डागर्दीमा संलग्न भएको आरोपमा पक्राउ परेका चर्चित ‘गुण्डा नाइके’ चक्रे मिलन उर्फ मिलन गुरुङले प्रहरी र सरकारी वकिलसमक्ष दिएको बयानले चासो बढाएको छ।

साउन १५ गते काठमाडौंको साम्बाला होटलबाट पक्राउ परेका चक्रेले आफू नेकपा (एमाले)को गोरखा जिल्ला पार्टी सदस्य भएको दाबी गरेका छन्। उनले भने, “पार्टीगत रूपमा आयोजित विशेष कार्यहरूमा सहभागी हुँदै आएको छु, समाजसेवामा पनि सक्रिय छु।”

उनको भनाइ अनुसार, पक्राउ परेको दिन साम्बाला होटलमा आफ्नो जन्मदिन मनाउन साथीहरू भेला भएका थिए। “त्यस क्रममा प्रहरीले आएपछि सामान्य भनाभन मात्र भयो, हतियार देखाउने, डरधम्की दिने वा अभद्र व्यवहार कतै भएन,” चक्रेले बताएका छन्।

चक्रेले अनुसन्धान प्रतिवेदनमा उल्लेख भएजस्तो धारिलो वा जोखिमयुक्त हतियार प्रदर्शन नगरेको जिकिर गरेका छन्। उनका अनुसार, आफू केही वर्षदेखि राजनीतिक र सामाजिक क्षेत्रमा सक्रिय छन् र यसै क्रममा पार्टीसँग आबद्ध भएर काम गर्दै आएका छन्।