काठमाडौं । पूर्वराष्ट्रपति विद्यादेवी भण्डारीकी छोरी उषाकिरण भण्डारीले एमालेको परराष्ट्र मामिला विभाग सदस्यबाट राजीनामा दिएकी छिन् । पूर्वराष्ट्रपति भण्डारीको पार्टी सदस्यता नवीकरण नगर्ने एमालेको निर्णयपछि असन्तुष्ट रहँदै आएकी मदन भण्डारीपुत्री उषाकिरणले परराष्ट्र मामिला विभागको सदस्यबाट राजीनामा दिएकी हुन् ।

मदन भण्डारीकी जेठी छोरी उषाकिरण अहिले मदन भण्डारी फाउन्डेसनकी अध्यक्षसमेत हुन् । उनले तीन दिनअघि नै राजीनामा दिएको भएपनि केही बताएकी छैनन् ।

हाल एमालेले परराष्ट्र मामिला विभागको प्रमुखको जिम्मेवारी सचिव रघुवीर महासेठलाई दिइएको छ ।

एमालेले पूर्वराष्ट्रपति भण्डारीलाई पार्टीको राजनीतिमा आउन रोक लगाएपछि छोरी उषाकिरणले गत साउन ८ मा नै सामाजिक सञ्जालबाट असन्तुष्टि जनाएकी थिइन् । पूर्वराष्ट्रपति भण्डारीलाई राजनीतिमा आउन रोक लगाउने निर्णयबाट आफू अचम्मित नभएको भन्दै उनले त्यस दिन सामाजिक सञ्जालमा एउटा स्ट्याटससमेत लेखेकी थिइन् । एमाले केन्द्रीय कमिटीको बैठकले भण्डारीलाई एमाले पार्टीको राजनीतिमा आउन रोक लगाउने निर्णय गरेपछि उनले स्ट्याटस लेखेकी थिइन् ।

‘तपाईंहरूमध्ये कति जना यो निर्णयबाट छक्क पर्नुभएको देखेर म छक्क परेँ । तपाईंहरू मानव प्रकृतिलाई नहेरी कसरी बाँचिरहनुभएको छ र निर्णय र निर्णयमा पुग्न गरिएका तिकडम दुवैबाट मचाहिँ अचम्मित छैन, म खुसी छु कि यो खुला रूपमा बाहिर आयो,’ उनले लेखेकी थिइन्, ‘आज कमरेड पुष्पलालको स्मृति दिवस पनि रहेछ, कस्तो संयोग !! मलाई उहिले उहिले लाग्थ्यो किन उहाँको परिवारमा नैतिक समर्थन गर्न पनि देखिने गरी प्रस्तुत हुँदैन, हामीलाई त आमाले राजनीति गर्न मन छैन भने पनि सधैँ देखिने गरी पार्टीको समर्थनमा उभिनु, नैतिक समर्थन गर्नु, टाढा नजानु भन्नुहुन्छ र सोही अनुरूप कोसिस गरियो । तर विगतको एक महिनादेखि मलाई ज्ञान भयो नैतिक समर्थन पनि गर्न नसकिने तहसम्म पनि पुर्‍याउने रहेछन् र नैतिक समर्थन खोज्दैनन् पनि । यो ज्ञानको बोझ आज यहाँ बिसाउने मौका यो प्रकरणले दियो– त्यस कारण यो प्रकरणलाई धन्यवाद !’