भैरहवा — राष्ट्रिय स्वतन्त्र पार्टीका सभापति रवि लामिछाने लाई राखिएको भैरहवा कारागारको राष्ट्रिय मानवअधिकार आयोगले आधारभूत सुविधा अभावग्रस्त भएको निष्कर्ष निकालेको छ।

आयोगका प्रतिनिधिहरूले सोमबार कारागारको अनुगमन गरेका थिए। प्रवक्ता लिली थापा का अनुसार, क्षमताभन्दा धेरै कैदीबन्दी राखिनु नै मुख्य समस्या हो। उनले कारागारभित्र पर्याप्त शौचालय नहुनु र भएका शौचालयको अवस्था पनि दयनीय रहेको बताइन्।

रविको ब्लकभित्र हावा आवतजावत राम्रो नभएको र झ्यालहरू टालिएको देखिएको उनले जनाइन्।

“उहाँको कोठामा पंखा त छ, तर झ्यालहरू टालिएका रहेछन्। जेल प्रशासनले सुरक्षाका कारण टालिएको बतायो। हाम्रो आग्रहपछि झ्याल खोल्ने तयारी गरिएको छ,” — लिली थापा, प्रवक्ता, NHRC

थापाले कोठाभित्र एसी नदेखिएको पनि स्पष्ट पारिन्। साथै, अदालतको आदेश हुँदाहुँदै पनि रविलाई अन्य कारागारमा स्थानान्तरण गर्न अनुमति नदिइएकोप्रति आयोगको गम्भीर ध्यानाकर्षण भएको बताइन्।

“यस विषयमा हामी कारागार व्यवस्थापन विभागसँग छलफल गर्नेछौं,” उनले भनिन्।

यसैबीच, इन्सेककी प्रतिनिधि रिमा बिसी ले कोठामा दुई पंखा—एक ठूलो फलामको र अर्को स्ट्यान्ड पंखा—रहेको बताइन्। उनका अनुसार, झ्याल नखोल्नुको कारण नजिकैका घरहरू र सर्पदंशको जोखिम भएको प्रशासनले बताएको हो।

“हामीले मोटो जाली वा डन्डी राखेर भए पनि झ्याल खोल्न सुझाव दियौं, जसलाई प्रशासनले स्वीकृति दिएको छ ।