सप्तरीमा जबर्जस्ती करणी मुद्दामा सफाइ पाएका युवकसँगै जन्मदिनको पार्टी मनाउने प्रकरणमा जिल्ला प्रहरी कार्यालयका तत्कालीन अनुसन्धान अधिकृत, इन्स्पेक्टर मनीष श्रेष्ठमाथि विभागीय कारबाहीको सिफारिस गरिएको छ।

मधेश प्रदेश प्रहरी कार्यालय, जनकपुरले एसपी नारायण रञ्जितकारको नेतृत्वमा तीन सदस्यीय छानबिन समिति गठन गरेर प्रतिवेदन डिआइजी उमाप्रसाद चतुर्वेदीलाई बुझाएको हो। प्रतिवेदन अनुसार, जिल्ला प्रहरी कार्यालय सप्तरी परिसरमा रहेको डिएसपीको निवासमा आरोपी सहभागी भएको ‘बर्थ डे सेलिब्रेसन’ आयोजना भएको पुष्टि भएको छ।

डिआइजी चतुर्वेदीका अनुसार, तत्कालीन डिएसपी जितेन्द्रकुमार बस्नेत निर्दोष ठहर भएका छन्। तर, इन्स्पेक्टर श्रेष्ठले आफैं बोलाएको नभए पनि, आफैंले मुद्दा चलाएको व्यक्तिसँग बसेर फोटो खिचेको र पार्टीमा सहभागी भएको पुष्टि भएपछि विभागीय कारबाही सिफारिस गरिएको हो।

यो विवादास्पद घटना ४ जेठमा सुरु भएको थियो। जबर्जस्ती करणी मुद्दामा जिल्ला अदालत सप्तरीबाट सफाइ पाएका राजविराज–६ का आकाश आदर्शले भोलिपल्टै इन्स्पेक्टर श्रेष्ठको जन्मदिनको नाममा पार्टी आयोजना गरेका थिए। पार्टी डिएसपी बस्नेतको क्वार्टरमा भएको थियो, जसमा डिएसपी बस्नेत, इन्स्पेक्टर श्रेष्ठ, इन्स्पेक्टर उदयकुमार राई र आरोपी आदर्शसहित सहभागी थिए।

०८१ असोजमा राजविराजस्थित एक रेस्टुरेन्टमा काम गर्ने महिलाले आकाश आदर्शविरुद्ध जबर्जस्ती करणी र भिडियो खिचेर धम्की दिएको आरोपमा जाहेरी दिएकी थिइन्। त्यसपछि उनलाई इन्स्पेक्टर श्रेष्ठको अनुसन्धानमा पक्राउ गरिएको थियो। थुनछेक बहसपछि पाँच लाख धरौटीमा रिहा भएका आदर्शलाई इन्स्पेक्टर श्रेष्ठले २० कात्तिकमा अदालतमा मुद्दा दायर गरेका थिए।