एमाले केन्द्रीय सदस्य एवम् उद्योग, वाणिज्य तथा आपूर्तिमन्त्री दामोदर भण्डारीका निजी सचिव लोकेन्द्र भण्डारीको राजधानीको नाइट क्लबमा एक युवतीसँग नाचिरहेको भिडियो सार्वजनिक भएको छ ।

सामाजिक सञ्जालमा तीव्र गतिमा फैलिएको भिडियोमा लोकेन्द्र भण्डारी रंगीन बत्तीको झिलिमिलीबीच एक युवतीसँग छमछमी नाचिरहेका देखिन्छन् ।

भिडियोमा भण्डारीले नीलो पोशाक लगाएकी एक युवतीलाई जुरुक्कै उचालेको देखिन्छ । भण्डारी ती युवतीसँग पहिल्यै परिचित थिए वा नाइट क्लब पुगेपछि मात्र परिचित भएका हुन्, त्यो भने खुलेको छैन ।

स्रोतका अनुसार, भिडियो रक्षाबन्धनकै दिन रातिको समयमा खिचिएको हो ।

मन्त्री भण्डारीका निजी सचिवको यस्तो गतिविधिले राजनीतिक र सार्वजनिक वृत्तमा चर्चा चुलिएको छ । कतिपयले यो व्यक्तिगत जीवनसँग सम्बन्धित भएको टिप्पणी गरे पनि, केहीले सरकारी पदमा बसेका व्यक्तिले सार्वजनिक छवि र जिम्मेवारीप्रति सचेत रहनुपर्ने सुझाव दिएका छन् ।

भिडियोबारे लोकेन्द्र भण्डारी वा मन्त्री दामोदर भण्डारीको तर्फबाट भने आधिकारिक प्रतिक्रिया आएको छैन । तर सामाजिक सञ्जालमा भिडियोको विषयमा चर्को बहस सुरु भइसकेको छ ।