कञ्चनपुरको बेलडाँडी गाउँपालिका–२ की १८ वर्षीया सम्झना भट्टको झुन्डिएको अवस्थामा मृत्यु भएपछि थप एक जनालाई प्रहरीले पक्राउ गरेको छ। प्रहरीले पक्राउ गरेका छन् सम्झनाका श्रीमान् पवन भट्टकी दिदी पूजा भट्टलाई, जसले आफ्नै भाइलाई ‘सम्झनालाई मारे पनि पाँच वर्ष सजाय हुन्छ, भाइले मार्नुपर्छ’ भन्दै आदेश दिएको अडियो फेला परेको छ।

गत आइतबार आफ्नै घरमा मृत भेटिएकी सम्झनाको मृत्युमा यसअघि श्रीमान् पवन, उनका बुवा हरिदत्त र आमा किरण भट्ट पक्राउ परेका थिए। पीडित पक्षको किटानी जाहेरीका आधारमा पूजा भट्टलाई कैलालीको धनगढी विमानस्थलबाट पक्राउ गरिएको कञ्चनपुर प्रहरीले जनाएको छ।

प्रहरीका प्रवक्ता डीएसपी सागर बोहोराका अनुसार पूजामाथि आत्महत्या गर्न दुरुत्साहन दिएको आरोपमा मुद्दा दर्ता गरिएको छ। यस प्रकरणमा सबै आरोपितलाई जिल्ला अदालतबाट म्याद थप गरी अनुसन्धान जारी राखिएको छ।

सम्झनाका माइती पक्षले विवाहपछि दाइजोको निहुँमा निरन्तर शारीरिक र मानसिक यातना भोग्नु परेको बताउँदै, पारिवारिक दवाव र यातनाका कारण उनले ज्यान गुमाउन पुगिन् भनी आरोप लगाएका छन्।

यो घटनाले नेपालको दाइजो प्रथा र महिला हिंसाको गम्भीर समस्या झल्काएको छ।