काठमाडौं — अन्तर्राष्ट्रिय अपराध सञ्जाल ‘अन्डरवर्ल्ड डन’ दाउद इब्राहिमका नजिकका सहयोगी शेख सलीम उर्फ सलीम पिस्टल नेपालमा पक्राउ परेका छन्। करिब पाँच दिनअघि राजधानी काठमाडौंबाट नियन्त्रणमा लिइएका उनलाई नेपाल प्रहरीले भारतको अनुरोधमा हालै भारतीय प्रहरीसमक्ष बुझाइसकेको छ।
स्रोतका अनुसार सलीम पिस्टल भारतमा ‘मोस्ट वान्टेड’ सूचीमा रहेका अपराधीमध्ये एक हुन्। उनले विभिन्न आपराधिक समूहलाई हतियार आपूर्ति गर्दै आएका थिए। पहिचान लुकाएर काठमाडौंमा बस्दै आएका उनको बारेमा भारतीय प्रहरीले दिएको सूचनाका आधारमा नेपाल प्रहरीले निगरानी बढाएको थियो।
प्रहरी स्रोतका अनुसार, पक्राउ परेका सलीमलाई अन्तर्राष्ट्रिय अपराध नियन्त्रणसम्बन्धी सहकार्य अन्तर्गत भारत पठाइएको हो। भारतमा उनीमाथि हतियार तस्करी, आपराधिक गिरोहलाई सहयोग, र हिंसात्मक घटनामा संलग्न भएको गम्भीर आरोप छ।
दुवै देशका सुरक्षा निकायबीच यस किसिमको समन्वय र छापामार कारबाहीलाई प्रहरी अधिकारीहरूले आपराधिक सञ्जाल तोड्न महत्वपूर्ण कदमका रूपमा लिएका छन्।
