प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिले पारित गरेको शिक्षा विधेयक अनुसार अब अस्थायी शिक्षकलाई स्थायी पदका लागि हुने प्रतिस्पर्धामा उमेरको कुनै हद लाग्ने छैन। समितिका सभापति अम्मरबहादुर थापाले प्रतिस्पर्धामा असफल हुने शिक्षकलाई ‘गोल्डेन ह्याण्डसेक’ मार्फत विदाइ गर्ने व्यवस्था विधेयकमा समावेश गरिएको जानकारी दिएका छन्।

रिपोर्टर्स क्लब नेपालमा आयोजित साक्षात्कार कार्यक्रममा बोल्दै सभापति थापाले विधेयकलाई “शिक्षक र विद्यार्थी दुवैप्रति उत्तरदायी” बनाइएको उल्लेख गरे। उनका अनुसार शिक्षा प्रणाली जागिरेमुखी नभई उत्पादनमुखी र आत्मनिर्भर बनाउने उद्देश्यले विधेयक अघि बढाइएको हो।

थापाले भने, “अब अस्थायी शिक्षक प्रतिस्पर्धा गर्न उमेरको हदबाट बाध्य हुने छैनन्। यदि आयोगको परीक्षा पास गर्न सकेनन् भने उहाँहरुलाई सम्मानपूर्वक गोल्डेन ह्याण्डसेक दिइनेछ। आयोग दिन पनि पाउने, फेल भए विदाइको सुविधा पनि पाउने व्यवस्था गरिसकेपछि अझ के सुविधा चाहिन्छ, मलाई थाहा भएन।”

उनका अनुसार सरकारले हालै ४२ हजार नयाँ दरबन्दी सिर्जना गरेको छ। तीमध्ये ६० प्रतिशत कोटा अस्थायी शिक्षकका लागि छुट्याइएको छ, जबकि उनीहरूको माग ७५ प्रतिशत थियो। “हामीले मिड पोइन्ट ६० प्रतिशत व्यवस्था गरेका छौं, यो पनि अन्याय भएको हो र? पास गर्न सक्दैनौ भने हामी चिट चोराएर पास गराउन सक्दैनौं,” थापाले थपे।

सभापति थापाले शिक्षा विधेयकको तयारीमा व्यापक परामर्श गरिएको बताए। सातै प्रदेशमा पुगेर नागरिक समाज, शिक्षक, विद्यार्थी, जनप्रतिनिधि र सरोकारवालासँग राय–सुझाव लिइएको उल्लेख गर्दै उनले १६५ जना सांसदले १,७५८ दफामा संशोधन प्रस्ताव राखेको जानकारी दिए।

थापाले शिक्षामा सुधारका लागि अबको दिशा उत्पादनमुखी, सीपमूलक र आत्मनिर्भर प्रणालीतर्फ जानुपर्नेमा जोड दिए। उनले असल र अनुशासित शिक्षकबिना गुणस्तरीय विद्यार्थी उत्पादन सम्भव नहुने स्पष्ट पारे।