कैलाली कारागारमा शुक्रबार राति कैदीबन्दीबीच भएको भीषण झडपपछि स्थिति अत्यन्तै तनावपूर्ण बनेको छ। घटनामा एक जनाको मृत्यु हुनुका साथै कम्तीमा ४७ जना घाइते भएका छन्, जसमा तीन जनाको अवस्था गम्भीर छ।

मृत्यु हुनेमा धनगढी उपमहानगरपालिका–४ का कैदी भरत चौधरी रहेका छन्। घाइतेहरूको सेती प्रादेशिक अस्पतालमा उपचार भइरहेको छ, जसमा दुई जनालाई आइसीयुमा राखिएको छ। अस्पतालमा पनि सुरक्षा कडा पारिएको छ।

शनिबार बिहान प्रमुख जिल्ला अधिकारी गोगनबहादुर हमाल, जिल्ला प्रहरी प्रमुख प्रहरी उपरीक्षक बालनरसिंह राणा, सशस्त्र प्रहरी उपरीक्षक सुरेन्द्रराज रञ्जितसहितको टोली कारागार पुगे पनि कैदीबन्दीले थुनुवा कक्षको मुल गेटमै ग्याँस सिलिन्डर राखेर आगो लगाउने चेतावनी दिएका कारण सुरक्षा टोली भित्र प्रवेश गर्न सकेन।

थुनुवा कक्ष बाहिर ठूलो संख्यामा नेपाल प्रहरी र सशस्त्र प्रहरी परिचालन गरिएको छ। बिहानैदेखि कैदीबन्दीले सुरक्षा निकायलाई प्रवेश निषेध गरेका छन्। राष्ट्रिय मानव अधिकार आयोगको टोली समेत घटनास्थल पुगेको भए पनि उनीहरूलाई पनि भित्र पस्न दिइएको छैन।

घटनाको छानबिनका लागि प्रमुख जिल्ला अधिकारी हमालको अध्यक्षतामा जिल्ला सुरक्षा समितिको बैठकले सहायक प्रमुख जिल्ला अधिकारी किरण जोशीको संयोजकत्वमा पाँच सदस्यीय समिति गठन गरेको छ। समितिमा नेपाल प्रहरीका डीएसपी राजकुमार सिंह, सशस्त्र प्रहरीका डीएसपी जनकराज पन्त, अनुसन्धान अधिकृत दीपेन्द्र सिंह सदस्य तथा जिल्ला प्रशासन कार्यालयका प्रशासकीय अधिकृत शिवराज जोशी सदस्य सचिव छन्।

समितिलाई १० दिनभित्र प्रतिवेदन बुझाउने निर्देशन दिइएको छ। घटनाबारे आधिकारिक विवरण भने अझै सार्वजनिक भएको छैन।