कैलाली कारागारमा बिहीबार राति भएको भीषण झडपमा धनगढी–४ का भरत चौधरीको मृत्यु भएको छ भने ५० जना घाइते भएका छन्।

राति करिब ११ बजे ए र बी ब्लकका कैदीहरूबीच सुरु भएको कुटपिटपछि कारागारमा वातावरण तनावपूर्ण बनेको छ। भिडन्तमा घाइते भएका ४६ जनाको सेती प्रादेशिक अस्पतालमा उपचार भइरहेको छ, बाँकीको अवस्था सामान्य रहेको बताइएको छ।

तनाव यति चर्कियो कि घटनाको विवरण बुझ्न गएका सुरक्षा निकायका प्रमुखहरूलाई समेत कैदीबन्दीहरूले भित्र पस्न दिएनन्। सिलिण्डर र रडसहित ढोकामा उभिएर उनीहरूले सुरक्षा टोलीलाई रोकेका हुन्। परिणामस्वरूप कारागार प्रशासनसम्म पुगेको टोली घटनास्थल नहेरी फर्किएको छ।

मिडियालाई पनि अस्पताल र कारागार परिसरमा जान रोक लगाइएको छ। आफन्तहरूलाई समेत घाइते र मृतकको अवस्था बारे जानकारी दिन प्रहरीले अस्वीकार गरेको छ।

डेढ सय क्षमता भएको उक्त कारागारमा अहिले ७ सयभन्दा बढी कैदीबन्दी राखिएका छन्, जसले स्थिति झनै संवेदनशील बनाएको छ।