तनहुँमा अचम्मको घटना घटेको छ। व्यास नगरपालिका–३ शान्तिनगरस्थित दमौली आवासीय माध्यमिक विद्यालयमा एक शिक्षकले कक्षामा मकै खाएको आरोपमा तीन जना विद्यार्थीलाई पाइपले कुटपिट गरेका छन्।

विज्ञान विषयका शिक्षक अर्विन नेपालीले कक्षा–८ का संकल्प कँडेल, रिदम खड्का र जुन गुरुङलाई गाला र कम्मरमा डाम बस्ने गरी पिटेका हुन्।

घटनाबारे बोल्दै शिक्षक नेपालीले भने,“म एक्सट्रा साइन्स क्लास लिइरहेको थिएँ। मकै खाएको गन्ध आयो, सोध्दा किताबकै प्रश्नको उत्तर दिन सकेनन्। त्यसपछि कुटेको हो।”

उनले कक्षामा मकै खाने नियम नभएको बताउँदै, “शिक्षक भएकाले अलिकति कुट्ने हक त हुन्छ नि, मायाले पढाएर मात्र कहाँ हुन्छ?” भन्दै प्रतिप्रश्न गरे।

घटनापछि आक्रोशित अभिभावकहरूले शिक्षक नेपालीमाथि पनि हातपात गरेका छन्।

जिल्ला प्रहरी कार्यालय तनहुँका सूचना अधिकारी डिएसपी अशोक थापाका अनुसार अहिलेसम्म औपचारिक जाहेरी परेको छैन। उनले भने,

“अभिभावक र विद्यालय प्रशासनलाई छलफलका लागि बोलाइएको छ।”