भारतको उत्तराखण्डमा आएको क्लाउड ब्रस्टका कारण भएको भीषण बाढी र पहिरोमा परी जाजरकोटका सात जना नेपालीको मृत्यु भएको छ। कुशे गाउँपालिकाका अध्यक्ष हरिचन्द्र बस्नेतले उक्त घटनामा ७ जनाको ज्यान गएको पुष्टि गरेका छन्।

मृत्यु हुनेहरूमा जाजरकोट–२, डोब्री पिपलधाराका कर्णबहादुर सिंह (४२), मानबहादुर सिंह (४५), रामबहादुर सिंह (४०), रबिन सिंह (१७) , निमबहादुर सिंह (३५) रहेका छन् ।

त्यस्तै, जुम्लाको तातोपानी गाउँपालिका, कुडारीका जनकबहादुर शाही र रुकुम पश्चिमका एक पुरुषको पनि मृत्यु भएको छ। मृतक रुकुमका व्यक्ति मानबहादुर सिंहका ज्वाइँ रहेको जानकारी दिइएको छ।

मृत्यु हुनेमध्ये मानबहादुरका छोरा नवीन सिंह भने भाग्न सफल भएका छन्। उनले आफन्तलाई म्यासेन्जर मार्फत घटना जानकारी गराएका थिए।

अध्यक्ष बस्नेतका अनुसार, “बाढीपछि बजार बगाएको देख्दा मानिसहरू पनि जोखिममा परेको अनुमान छ। अहिले केही व्यक्ति बेपत्ता छन् र उनीहरूको खोजी तथा उद्धारका लागि कूटनीतिक पहल आवश्यक छ।”

सिजन अनुसार भारतमा रोजगारीका लागि जाने ती नेपालीहरू असार-श्रावणमा धान रोपाइँ सकिएपछि उत्तराखण्ड गएका थिए।

वर्तमानमा भारत सरकारले उक्त क्षेत्रमा इन्टरनेट र मोबाइल सेवा बन्द गरेकोले सम्पर्कमा समस्या भइरहेको छ।