प्रतिनिधिसभाअन्तर्गत शिक्षा, स्वास्थ्य तथा सूचना प्रविधि समितिको बैठक शुक्रबार तनावग्रस्त बन्यो। निजी विद्यालय र छात्रवृत्ति व्यवस्थाबारेको छलफलकै बीचमा नेपाली कांग्रेसका प्रमुख सचेतक श्यामकुमार घिमिरे र राष्ट्रिय स्वतन्त्र पार्टी (रास्वपा) की सांसद सुमना श्रेष्ठबीच तीखो वाकयुद्ध भयो।

बैठकमा सुमनाले संविधानमा उल्लेख भएअनुसार कमजोर वर्गका लागि राज्यको जिम्मेवारी पूरा गर्नुपर्नेमा जोड दिइन्।
उनले भनिन् —“राज्य जो कमजोर वर्ग छ, त्यही वर्गका लागि हो। गरिब, जेहेन्दार विद्यार्थीको छात्रवृत्तिअन्तर्गत आवासको पनि व्यवस्था गर्नैपर्छ। संविधानमा लेखिएको कुरा ऐनमा पनि व्यवस्था गरिनुपर्छ। होइन भने संविधान च्यातिदिऊँ।”

सुमनाको भनाइको प्रतिवाद गर्दै कांग्रेस सांसद घिमिरेले आवासीय छात्रवृत्ति अव्यावहारिक भएको दाबी गरे।उनले कटाक्ष गर्दै भने —“विदेशी मुलुकमा विद्यालयले राज्यको भार लिएबापत अनुदान दिन्छन्, तर नेपालमा त्यो अभ्यास छैन। क्यामेरा देखेपछि जे पनि बोल्ने? खालि स्टन्ट मात्र गर्ने?”

यसमा सुमनाले तत्क्षण प्रतिक्रिया दिँदै भनिन् —“दोहोरी खेल्ने? मैले नाम लिएको छु?”विवाद चर्किँदै जाँदा कांग्रेसकै सांसद चन्द्र भण्डारीले सुमनाको प्रस्तावको केही अंश समर्थन गर्दै कम्तीमा १ प्रतिशत आवासीय छात्रवृत्ति राख्ने सुझाव दिए।
उनले भने —

“गरिबको घरमा आइन्स्टाइन जन्मिन सक्छ। समाजमा यति जेन्युन विद्यार्थी हुन्छन्। तीलाई सुविधा दिनुपर्छ। हामीले १ प्रतिशत आवासीय दिऊँ, समाजमा नयाँ केही सुरुवात गरौँ।”

तनावपूर्ण माहोलबीच समिति सभापति अम्मरबहादुर थापाले दुवै पक्षलाई चुप लाग्न आदेश दिए।“तपाईंहरू चुप लाग्नुहोस्। मैले रुलिङ गर्ने कि तपाईंहरूले?”शिक्षामन्त्री रघुजी पन्तले समेत घिमिरेलाई पटक–पटक चुप बस्न आग्रह गरेका थिए।