लुम्बिनी प्रदेशका युवा तथा खेलकुद मन्त्री सन्तोष पाण्डेय फेरि सडकमा खटिएका प्रहरीसँगको विवादमा तानिएका छन्। भैरहवा–परासी सडकखण्डको बसन्तपुरमा मंगलबार ट्राफिक प्रहरीले भारतीय नम्बर प्लेटको मोटरसाइकल रोकेर ब्लुबुक माग्दा, चालकले मोबाइल मन्त्रीलाई दिए। फोनमा आफू पाण्डेय भएको भन्दै उनले प्रहरीलाई चेतावनी दिए।

केही मिनेटमै घटनास्थल पुगेका मन्त्री पाण्डेयले प्रहरीको हातबाट जरिवाना काट्दै गरेको रसिदको ठेली खोसेर “यो जाँच बन्द गर” भन्दै कड्काए। उनले जाँचका कारण पर्यटन र व्यापार प्रभावित भइरहेको दाबी गरे।

पाण्डेय मन्त्री हुनु अघिदेखि नै भारतीय सवारीसाधनको जाँचका विषयमा प्रहरीसँग टकरावमा आउने गरेका छन्।

केही साताअघि नो–पार्किङमा पार्क गरिएको भारतीय कारलाई जरिवाना गर्दा उनले प्रहरीलाई सडकमै थर्काएका थिए।

बेलहिया नाकामा अटोमा आएका भारतीय यात्रुलाई सशस्त्र प्रहरीले जाँच गर्दा समेत पाण्डेयले हस्तक्षेप गरेका थिए।

रूपन्देहीका प्रहरी प्रमुख एसपी प्रदीप क्षेत्री भन्छन् —“यदि प्रहरीले गल्ती गरेको छ भने उच्च अधिकारीलाई खबर गर्नुपर्छ। तर सडकमा खटिएका साना तहका प्रहरीलाई सिधै थर्काउनु गलत हो। यसले उनीहरूलाई काम गर्न निरुत्साहित बनाउँछ।”
प्रहरीका अनुसार, राजमार्गमा जाँच सडक दुर्घटना नियन्त्रण र सवारी नियम पालनाको लागि आवश्यक छ।

मन्त्री पाण्डेयको भनाइमा भने प्रहरीको नियत ठीक छैन।“भारतीय गाडी देख्यो कि जरिवाना असुल गर्ने परिपाटी छ। धेरै पटक रसिद नकटाई पैसा लिएको पनि सुनेको छु। यस्तो गलत अभ्यास रोक्न म सर्वसाधारण र पर्यटकको पक्षमा बोल्छु,” उनले भने।
उनका अनुसार, जरिवाना लिनु मात्र होइन, नियमबारे जानकारी दिनु पनि प्रहरीको कर्तव्य हो।