काठमाडौं –भारतको उत्तराखण्ड राज्यमा आएको भीषण बाढीमा नेपालका जाजरकोट र बर्दियाका कम्तीमा १७ जना नेपाली नागरिक बेपत्ता भएका छन्। जाजरकोटको कुशे गाउँपालिका वडा नं. २ का १३ जना भन्दा बढी, तथा अन्य वडाबाट केही थप नागरिक सम्पर्कविहीन रहेको पुष्टि भएको छ।

कुशे गाउँपालिका अध्यक्ष हरिचन्द्र बस्नेतद्वारा जारी विज्ञप्तिमा भनिएको छ:“उक्त बाढी तथा पहिरोमा वडा नं. २ का करिब १३ जनाभन्दा बढी र अन्य वडाका केही व्यक्तिहरू सम्पर्कविहीन छन्। घटनाबारे सामाजिक सञ्जाल र टेलिफोनमार्फत जानकारी प्राप्त भएको हो।”

उनले नेपाल सरकार र परराष्ट्र मन्त्रालयमार्फत तत्काल कूटनीतिक पहल गरी खोजी र उद्धार कार्यलाई द्रुत बनाउने आग्रह पनि गरेका छन्।

अध्यक्ष बस्नेतका अनुसार, बाढीमा बेपत्ता भएका मानबहादुर सिंहका छोरा नवीन सिंहले फोनमार्फत आफ्ना बुबासहित ७ जना हराएको जानकारी गराएका छन्।

यसअघि बर्दियाका प्रमुख जिल्ला अधिकारी सुरेन्द्र पौडेलले कम्तीमा ४ जना नेपाली बेपत्ता भएको जानकारी दिएका थिए। उनका अनुसार:“आफन्त र त्यहाँ रहेका नेपालीमार्फत उनीहरू बेपत्ता भएको पुष्टि भएको छ। थप ३ जना घाइते भएका छन्। मन्त्रालयलाई जानकारी गराइसकिएको छ र दूतावासमार्फत समन्वय भइरहेको छ।”

उत्तराखण्डमा आएको बाढीका कारण १०० भन्दा बढी व्यक्ति बेपत्ता भएका छन्।

५ जनाको मृत्यु भइसकेको पुष्टि भारतीय सञ्चारमाध्यमहरूले गरेका छन्।

बाढीपछि उद्धार कार्य अवरुद्ध भएको र जनजीवन पूर्णरूपमा अस्तव्यस्त बनेको उल्लेख गरिएको छ।

भारतस्थित नेपाली दूतावासले भारतीय पक्षसँग लगातार समन्वय गरिरहेको जनाएको छ। बेपत्ता नेपालीको खोजी तथा उद्धार कार्यमा सहयोग जुटाउन कूटनीतिक तहमा सम्वाद जारी छ।