काठमाडौं –लोकप्रिय लोकदोहोरी गायक खेम सेन्चुरी आकस्मिक स्वास्थ्य समस्या भएपछि त्रिभुवन अन्तर्राष्ट्रिय विमानस्थलबाटै काठमाडौंको केएमसी अस्पतालमा भर्ना भएका छन्।
सेन्चुरी एक महिनाको सांगीतिक यात्रामा सहभागी हुन बिहीबार साँझ क्यानडा जान लागेका थिए। तर, बोर्डिङ पास लिइसकेपछि अचानक पेटमा समस्या देखिएपछि तत्कालै अस्पताल लगिएको हो।
क्यानडाको सबैभन्दा ठूलो हिमालयन मेलामा सहभागी हुन जाँदै गरेका गायक सेन्चुरीलाई किड्नीमा स्टोन खस्दा अत्यधिक पीडा भएको बताइएको छ।
प्रारम्भिक जानकारी अनुसार, “किड्नीको स्टोन खसेर दर्द भएको हो,” स्रोतले जानकारी दिएको छ।
हाल उनलाई केएमसी अस्पतालमा चिकित्सकीय निगरानीमा राखिएको छ।
चिकित्सकहरूका अनुसार, औषधि प्रयोग गरेर नियन्त्रण गर्ने कि शल्यक्रिया (अपरेसन) गर्ने भन्ने विषयमा भोलिसम्म स्पष्ट हुने बताइएको छ।
उनलाई भर्ना गरिएको विभाग र थप परीक्षण रिपोर्ट आएपछि मात्र निर्णय लिइनेछ।
सेन्चुरी यही अगस्ट ९ (साउन २४) मा क्यानडामा हुने Himalayan Festival Canada 2025 मा मुख्य कलाकारको रुपमा सहभागी हुने कार्यक्रम तय भएको थियो।
क्यानडाका नेपाली समुदायबीच अत्यन्त लोकप्रिय सेन्चुरीको उपस्थितिलाई विशेष चासोको रूपमा हेरिएको थियो।
खेम सेन्चुरी नेपाली लोकसंगीतमा आकर्षक स्वर, जीवन्त प्रस्तुति र देशभक्तिपूर्ण गीतहरूका लागि परिचित छन्।
उनले थुप्रै हिट गीतहरू बजारमा ल्याइसकेका छन् र देश–विदेशमा कार्यक्रमहरू गर्दै आएका छन्।
प्रतिक्रिया
सम्बन्धित खवर
