काठमाडौं –लोकप्रिय टिकटकर आयुष सिंह ठकुरी र उनकी श्रीमती अलिजे जमालीविरुद्ध गाली–बेइज्जतीको मुद्दा दर्ता भएको छ। यो मुद्दा आयुषकी आमा नानु सिंह ठकुरीले काठमाडौं जिल्ला अदालतमा दर्ता गरेकी हुन्।

मुद्दा जेठ २५ गते दर्ता भइसकेको भए पनि आयुषले भर्खरै मात्र जानकारी पाएको बताएका छन्। श्रीमती अलिजे जमाली पनि मुद्दामा प्रतिवादी बनाइएको छ।

आयुषका कानुनी प्रतिनिधि वकिल पर्वतराज चापागाईंले अहिले केही भन्न सक्ने अवस्था नरहेको प्रतिक्रिया दिएका छन्। केही महिनाअघि आमा–छोराबीचको सार्वजनिक विवादले टिकटकमा निकै चर्चा पाएको थियो।

नानु सिंह आफैं पनि टिकटकमा सक्रिय भएपछि विषयले ठूलो ध्यान खिचेको थियो।एक अर्काबारे खुलस्त अभिव्यक्ति दिँदा फ्यानहरू पनि दुई धारमा बाँडिएका थिए।अहिले उनीहरू संगै नबसेको र कहिलेकाहीँ मात्र सम्पर्क हुने आयुषको भनाइ छ।

आयुष सिंह ठकुरी सामाजिक सञ्जाल विशेषगरी टिकटक मार्फत चर्चामा आएका युवाहरू मध्ये एक हुन्।उनले धेरै गीत, ट्रेन्ड र नाटकीय भिडिओमार्फत विशाल दर्शक समूह बनाएका छन्। तर, व्यक्तिगत जीवनका विवादहरूले उनको छवि उतारचढावमा परेको देखिन्छ।