काठमाडौं –पूर्वराष्ट्रपति विद्यादेवी भण्डारीले एमालेको राजनीतिमा पुन: सक्रियता जनाउँदै काठमाडौं थापागाउँस्थित मदन भण्डारीले २०४८ सालमा चुनाव लडेको घरमा सम्पर्क कार्यालय खोल्ने भएकी छन्।

थापागाउँको मण्डला नाटकघर नजिक रहेको तीनतले घर भाडामा लिएर सम्पर्क कार्यालय खोल्ने तयारी गरिएको हो।उक्त घर पूर्वमहासचिव मदनकुमार भण्डारीले २०४८ सालमा चुनाव प्रचार सञ्चालन गरेको ऐतिहासिक स्थान हो।

त्यही घरमा विद्याले २०५१ सालको चुनावमा पनि प्रचारप्रसार कार्यालय बनाएकी थिइन्।अब सोही घर मदन भण्डारी फाउन्डेशनको नाममा भाडामा लिइएको छ र केही दिनमै उद्घाटन गरिने तयारी छ।

गत असार १४ गते मदन भण्डारी फाउन्डेशनको कार्यक्रममा आफू सक्रिय राजनीतिमा फर्किएको घोषणा गरेकी थिइन्।तर साउन ५ र ६ गतेको एमाले केन्द्रीय कमिटी बैठकले उनलाई राजनीतिमा आउन निषेध गरिसकेको छ।२०८१ वैशाखमा नवीकरण गरेको संगठित सदस्यता एमालेले अमान्य घोषित गरिसकेको छ।

अध्यक्ष ओलीले ७० वर्षे उमेर सीमा र कार्यकारी पदमा २ कार्यकालको सीमा हटाए पनि विद्यालाई रोक लगाइएको छ।कार्यालयमार्फत विद्याले एमाले कार्यकर्ता तथा समर्थकसँग प्रत्यक्ष संवाद सुरु गर्ने तयारी छ।हाल उनी बूढानीलकण्ठस्थित आफ्नै निजी निवासमा बसेर राजनीतिक गतिविधि सञ्चालन गर्दै आइरहेकी छन्।

भण्डारीलाई दोस्रो विधान महाधिवेशन (भदौ २०–२२) मा समेत सहभागी हुन नदिने एमाले निर्णय भइसकेको छ।तर, उनले कार्यालयमार्फत राजनीतिक संवाद निरन्तरता दिने नीति अपनाएकी छन्।

थापागाउँको सो घर पूर्व उपमेयर तथा एमाले नेता बिदुर मैनालीको स्वामित्वमा रहेको हो।यसअघि पनि मदन भण्डारी फाउन्डेशनमार्फत विभिन्न राजनीतिक गतिविधिमा सक्रियता देखाउँदै आएकी थिइन्।