ललितपुर, ललितपुरको इमाडोलमा प्रेमीको घर गएकी १८ वर्षीया किशोरीको रहस्यमय मृत्यु भएको छ। पहिलो पटक प्रेमीको घर गएकी युवती बेहोस भएपछि किष्ट अस्पताल लगिएको थियो, तर त्यहाँ पुर्याउँदासम्म उनको मृत्यु भइसकेको चिकित्सकले पुष्टि गरेका छन्।
मृतक किशोरी ललितपुरको महालक्ष्मी नगरपालिका–३ बोझेपोखरीकी हुन्। घटनापछि उनका प्रेमी इमाडोलका १८ वर्षीय आर्यन पाण्डेलाई प्रहरीले पक्राउ गरेको छ।
प्रहरीका अनुसार ती किशोरी र आर्यन पाण्डेबीच सामाजिक सञ्जालमार्फत चिनजान भएको थियो र केही महिनादेखि प्रेम सम्बन्धमा थिए। बुधबार दिउँसो करिब १२ बजे किशोरी पहिलो पटक आर्यनको घर इमाडोल गएकी थिइन्।
आर्यनको भनाइअनुसार, कोठामा बसिरहेको क्रममा किशोरी एक्कासी बेहोस भइन्। त्यसपछि उनले आफ्ना बुबालाई खबर गरे र बुवा आइसकेपछि उनलाई ग्वार्कोस्थित किष्ट अस्पताल लगिएको थियो।
अस्पताल पुर्याउँदा चिकित्सकले मृत्यु भइसकेको घोषणा गरेका थिए।
जिल्ला प्रहरी परिसर ललितपुरका एसपी चक्रराज जोशीका अनुसार घटनापछि आर्यनलाई पक्राउ गरिएको छ।
“उनीहरू प्रेम सम्बन्धमा थिए भन्ने प्रारम्भिक प्रमाण भेटिएको छ। मृत्युको कारण यथार्थ थाहा पाउन पोष्टमार्टम रिपोर्ट कुर्नु पर्नेछ,” – एसपी जोशी।
घटनास्थलमा किशोरीले लेखेको ‘लभलेटर’ पनि फेला परेको प्रहरीले जनाएको छ। हाल आर्यनलाई प्रहरी वृत्त सातदोबाटोको हिरासतमा राखी थप अनुसन्धान भइरहेको छ।
प्रतिक्रिया
सम्बन्धित खवर
