एजेन्सी । बङ्गलादेशको दक्षिण–पूर्वी नोआखाली जिल्लामा भएको एक भीषण सडक दुर्घटनामा एउटै परिवारका सात जनाको दर्दनाक मृत्यु भएको छ। मृतकमध्ये तीन जना बालबालिका रहेका छन्।
चन्द्रगञ्ज हाइवे प्रहरी चौकीका प्रमुख मोबारक हुसैनका अनुसार, पीडितहरू हजरत शाहजलाल अन्तर्राष्ट्रिय विमानस्थलबाट आफन्तलाई लिएर माइक्रोबसमा घर फर्किरहेका थिए। सोही क्रममा गन्तव्यतर्फ जाँदै गर्दा बेगमगञ्ज उप–जिल्ला नजिक सवारी साधन अनियन्त्रित भई सडक छेउको नहरमा खस्दा दुर्घटना भएको हो।
“हामी अनुमान गर्छौं कि चालक निदाएका थिए, जसका कारण सवारी नियन्त्रण गुमाएर दुर्घटना भयो,” हुसैनले बताए। दुर्घटना स्थानीय समय अनुसार बिहान करिब ६ बजे भएको र सवार सबैको घटनास्थलमै मृत्यु भएको पुष्टि गरिएको छ।
बङ्गलादेशमा सडक दुर्घटनाको दर नियन्त्रणबाहिर गइरहेको छ। विज्ञहरूका अनुसार कमजोर सडक संरचना, मर्मतविहीन सवारी साधन, अयोग्य चालक, ट्राफिक नियमको खुलेआम उल्लंघन र ट्राफिक निगरानी प्रणालीको कमजोरीजस्ता कारणले दुर्घटनाको जोखिम निरन्तर बढ्दो छ।
