काठमाडौंको माछापोखरीस्थित राजधानी रोधीघरमा मध्यरातमा गुण्डागर्दी गर्ने चार जनालाई प्रहरीले पक्राउ गरेको छ। मंगलबार राति करिब १२:४० बजेको समयमा उनीहरूले युवतीमाथि अश्लील हर्कत, हातपातको प्रयास र धारिलो हतियार प्रदर्शन गरेका थिए।

प्रहरीका अनुसार पक्राउ परेकाहरूले रोधीघरमा कार्यरत एक युवतीमाथि दुर्व्यवहार गर्दै धाकधम्की र अश्लील व्यवहार गरेका थिए। घटनापछि प्रहरी बोलाइएपछि उनीहरूलाई रोधीघर बाहिरैबाट नियन्त्रणमा लिइएको हो।

पक्राउ पर्नेमा: दीपक कार्की (३७) – मकवानपुर हेटौँडा उपमहानगरपालिका–५, हाल टोखा नगरपालिका–३ सूर्यदर्शन हाइट, निरज गुरुङ – नुवाकोट ककनी गाउँपालिका–५, हाल टोखा नगरपालिका–३, रोशन डंगोल (२८) – टोखा सरस्वती टोल , रोहन डंगोल (२४) – टोखा गणेशस्थान रहेका छन् ।

उनीहरूलाई राति १ बजे पक्राउ गरिएको थियो। पीडित युवतीलाई तत्कालै बोलाई सनाखत समेत गरिएको प्रहरीले जनाएको छ।पक्राउ परेकामध्ये निरज गुरुङ र रोशन डंगोल पूर्वपटक पक्राउ परेका पटके अभियुक्त रहेको खुलेको छ।

रोशन डंगोलको अपराध रेकर्ड:
२०७३ फागुन ६ – सार्वजनिक अपराध

२०८० चैत २२ – ज्यान मार्ने उद्योग (प्रहरी वृत्त महाराजगञ्ज)

निरज गुरुङको अपराध रेकर्ड:
२०७६ पुस २२ – पक्राउ (महाराजगञ्ज)

२०८० असोज ५, असार १७, २०८१ असोज ७ – अभद्र व्यवहार (बालाजु, लैनचौर)

२०८१ असोज २४ – ज्यान मार्ने उद्योग (महाराजगञ्ज)

प्रहरीका अनुसार पीडित युवती कला क्षेत्रमा सक्रिय रहेको र घटना बेलामा आफ्नो दाइको रोधीघरमा पुगेकी थिइन्। सोही समयमा चार युवाले दुव्र्यवहार र धम्कीपूर्ण व्यवहार गरेका थिए। पक्राउ परेका सबैलाई आवश्यक अनुसन्धानपछि प्रचलित कानूनी प्रक्रिया अनुसार कारबाही अघि बढाइने काठमाडौं उपत्यका अपराध अनुसन्धान कार्यालयका प्रवक्ता एसपी काजी कुमार आचार्यले जानकारी दिएका छन्।