चितवन । नेपाल विद्युत प्राधिकरण, चनौली वितरण केन्द्रका प्रमुख रामकुमार श्रेष्ठलाई सरुवा गरिएको छ । लोडसेडिङको झल्को दिने गरी एकदिने विद्युत कटौतीको तालिका प्रकाशन गरेपछि राष्ट्रिय स्तरमै आलोचित बनेका श्रेष्ठलाई प्राधिकरणले पूर्वी नवलपरासीको कावासोती वितरण केन्द्रमा सरुवा गरेको हो ।
गत साउन १० गते केन्द्र प्रमुख श्रेष्ठले पश्चिम चितवनका विभिन्न स्थानमा मागअनुसार विद्युत आपूर्ति हुन नसकेको भन्दै लोडसेडिङकै झल्को दिने सूचना निकालेका थि ए। उक्त सूचना सार्वजनिक भएपछि सामाजिक सञ्जाल र सञ्चारमाध्यममा प्राधिकरणको व्यापक आलोचना भएको थियो ।
बढ्दो जनगुनासो र आलोचनापछि प्राधिकरणका कार्यकारी निर्देशक हितेन्द्रदेव शाक्य आफैँ अवस्था बुझ्न साउन १२ गते चितवन आएका थिए । तर, कार्यकारी निर्देशक शाक्य समस्याग्रस्त चनौली वितरण केन्द्र पुग्दा केन्द्र प्रमुख श्रेष्ठ जिल्लामै भएर पनि कार्यालयमा उपस्थित थिएनन् । श्रेष्ठ कार्यालयमा नभेटिएपछि शाक्यले अन्य इन्जिनियरहरूसँग अवस्थाबारे जानकारी लिएर फर्किएका थिए ।
यसैबीच, पश्चिम चितवनको माडी, जगतपुर, शुक्रनगर, विजयनगर, रामपुर तथा पूर्वी चितवनका केही स्थानमा देखिएको विद्युत आपूर्तिको समस्या भने साउन १३ गतेदेखि नै समाधान भइसकेको प्राधिकरणले जनाएको छ । प्राधिकरणले आफ्नो कर्मचारी सेवा सर्त विनियमावली २०७५ को विनियम ४९ को उपविनियम १ को खण्ड(ग) बमोजिम श्रेष्ठलाई वितरण तथा ग्राहक सेवा निर्देशनालय अन्तर्गत कावासोती वितरण केन्द्रमा सरुवा गर्ने निर्णय गरेको हो ।
