कञ्चनपुर — फागुन महिनामा प्रेम विवाह गरेकी कञ्चनपुरकी १७ वर्षीया सम्झना भट्ट आफ्नै घरभित्र झुन्डिएको अवस्थामा मृत फेला परेकी छन्।
प्रहरीका अनुसार, सम्झना बेलडाँडी गाउँपालिका–२ सिहपाल टोलस्थित घरको झ्याल र ढोकामा चुकुल लगाएर झुन्डिएको अवस्थामा भेटिएकी हुन्। घरको ढोका फोडेर शव निकालिएको थियो।

सम्झना र २४ वर्षीय पवन भट्टबीच १४/१५ वर्षको उमेरदेखि प्रेम सम्बन्ध रहेको र उनीहरूले गत फागुनमा विवाह गरेका थिए।
विवाहअघि र पछाडि पनि विवाद र झगडा भइरहने गरेको प्रहरी अनुसन्धानले देखाएको छ।

एक प्रहरी अधिकारीका अनुसार, “विवाहअघि पनि झगडा प्रहरीसम्म पुगिसकेको थियो। गत मङ्सिरमा जिल्ला प्रहरी कार्यालयको महिला सेलामा दुई दिनपछि मात्र विवाद समाधान गरिएको थियो।”

त्यसपछि काठमाडौंमा पनि विवाद भएको थियो। मृत्यु हुनु एक दिनअघि मात्र इलाका प्रहरी कार्यालय बेलडाँडीमा विवाद पुगेको र प्रहरीले सम्झाएर पठाएको भोलिपल्टै सम्झना मृत अवस्थामा फेला परेको प्रहरीको भनाइ छ।

सम्झनाको उमेर १७ वर्ष र पतिको उमेर २४ वर्ष रहेको छ।
विवाहपछि सम्झनालाई कुटपिट हुने गरेको भन्दै परिवारजनले उजुरी दिएका थिए।
यसै सिलसिलामा पवन भट्टलाई प्रहरीले नियन्त्रणमा लिएर सोधपुछ गरिरहेको डिएसपी सागर बोहराले जानकारी दिए।

“घटनाबारे हामी गम्भीर छौं, शवको पोस्टमार्टम भइरहेको छ र सत्यतथ्य पत्ता लाग्नेछ,” डिएसपी बोहराले भने।
सम्झनाका परिवारले घटनाको निष्पक्ष छानबिन र दोषीलाई कारबाही गर्न माग गरेका छन्।