नवयुवराज हृदयन्द्र शाहले बुधबार सार्वजनिक गरेको भिडियो भ्लग अहिले सामाजिक सञ्जालमा भाइरल बनेको छ।
पूर्वयुवराज पारस शाह र हिमानी शाहका छोरा हृदयन्द्रले नेपालको एक विकट तर प्राकृतिक सौन्दर्यले भरिएको जिल्ला जुम्लामा गरेको भ्रमण अब सार्वजनिक भइसकेको छ — शब्द र तस्बिरमा होइन, उनैको स्वर, भाव र दृष्टिकोणमा।

यो १५ मिनेटको भिडियो एउटा युवाको यात्रा मात्र होइन, देशलाई बुझ्ने, महसुस गर्ने र केही गर्ने चाहना भएको नवपुस्ताको प्रतिनिधित्व पनि हो।

हृदयन्द्रले हिमानी फाउण्डेसनको कार्यक्रमअन्तर्गत कर्णाली क्षेत्रको भ्रमण गरेका थिए।
तर यो भ्रमण औपचारिकभन्दा आत्मीय बन्यो — स्थानीय स्याउ किसान, जुम्ला बजारका युवा उद्यमी, वृद्धवृद्धा, शिक्षक–विद्यार्थीसँग नजिकको भेटघाटले।

एक दृश्यमा स्थानीय युवती पञ्चकली बुढाको प्रश्न आयो,

“हाम्रो नेपाल समृद्ध कहिले हुन्छ होला?”

हृदयन्द्रले मुस्कुराउँदै जवाफ दिए,

“सबै जना मिलेर राम्रो काम गरे, आँट गरे — अवश्य हुन्छ। हामी पनि लाग्नुपर्छ।”

भिडियोमा हृदयन्द्र न त राजसी पोशाकमा छन्, न औपचारिक भाषामा बोलिरहेका छन्।
सादगीपूर्ण पहिरन, खुला मुस्कान, अनि सहज तरिकाले जनताको मन बुझ्ने प्रयास — उनले आफ्ना प्रशंसकमात्र होइन, आम नागरिकको मन छोएका छन्।

उनी जुम्लाको पहिलो यात्रामा गहिरो भावुकता व्यक्त गर्छन्:

“फेरी पनि घुम्न आइन्छ…जुम्ला साँच्चै सुन्दर छ।”

हृदयन्द्रले आफू वानपिस जस्ता एनिमे सिरिजको ठुलो फ्यान भएको पनि खुलाएका छन्।
भित्तामा टाँसिएको एनिमे पोस्टर देखाउँदै भन्छन्,”मैले पनि एनिमे बनाउने गरेको छु।”

स्नातक अध्ययनका लागि हाल अमेरिका बसेका हृदयन्द्रले देश फर्कने योजना बनाइरहेका छन्।
भन्छन्,

“डिग्री सकिएपछि नेपाल फर्किन्छु। देशका लागि केही गरिन्छ।”

फेसबुकमा अपलोड भएको भ्लगलाई साढे २ लाखभन्दा धेरै दर्शकले हेरेका छन्, हजारौं प्रतिक्रिया र सेयर पाइएको छ।
धेरैले हृदयन्द्रको विनम्रता, व्यवहार, विचार र प्रस्तुतीलाई देशका युवाको प्रेरणा भन्दै प्रशंसा गरेका छन्।

हृदयन्द्रको यो भ्लगले पूर्वराजपरिवारको सन्तानभन्दा बाहिर गएर एक संवेदनशील, सोच्ने, देशप्रेमी युवाको छवि प्रस्तुत गरेको छ।
उनको शैली न भूगोलको दम्भ बोकेको छ, न इतिहासको घमण्ड —भविष्यप्रति आशावादी एउटा नवयुवराजको स्वाभाविक अभिव्यक्ति मात्र हो।