धनुषामा सोमबार राति एक दर्दनाक घटना घटेको छ। एकजना व्यक्तिले त्यो पनि विगतमा आफ्नै श्रीमतीको हत्या गरेर जेल बसिसकेका व्यक्तिले फेरि एकपटक निर्दोष ज्यान लिएका छन्।

धनुषाको जनकपुरधाम उपमहानगरपालिका–४ मा सोमबार राति करिब साढे ११ बजेतिर एकाएक तर्साउने चिच्याहट सुनियो। शान्त रात एकाएक तातियो जब रामबाबु साह नामका एक पुरुषले खुकुरी बोकेर आक्रमण गरे।

ती रामबाबु साह– धनुषाकै क्षीरेश्वरनाथ नगरपालिका–९ इच्छापुरका बासिन्दा, जो केही वर्षअघि आफ्नै श्रीमतीको हत्या गरेर जेल सजाय भोगिसकेका थिए। पाँच वर्षको जेल जीवनपछि रिहा भएका उनी, अहिले फेरि एक निर्दोष ज्यानको काल बने।

यस पटक उनको निशाना बनिन् — १४ वर्षीया अञ्जलीकुमारी यादव। जनकपुरको एक डेरामा परिवारसहित बस्दै गरेकी ती बालिकालाई उनले निर्दयतापूर्वक खुकुरीले प्रहार गरे। घटनास्थलमै उनको मृत्यु भयो।

त्यसपछि आक्रमण भयो अञ्जलीकी आमा, ३५ वर्षीया आशा यादवमाथि। उनको टाउको र शरीरमा गम्भीर चोट लागेको छ। अझै पनि अस्पतालमा उनको जीवन मरणको सङ्घर्ष चलिरहेको छ।

त्यही घरमा डेरा गरेर बसिरहेकी अर्को किशोरी, १४ वर्षीया राधा यादव पनि खुकुरीको चपेटामा परिन्। उनको हात र खुट्टामा गहिरो चोट लागेको छ। चिकित्सकहरूका अनुसार, अवस्था गम्भीर भए पनि ज्यान जोगिएको छ।

प्रहरीका अनुसार रामबाबु साह मानसिक रूपमा असन्तुलित हुनसक्ने अनुमान गरिएको छ, तर घटना नियोजित हो वा आकस्मिक — त्यसबारे अनुसन्धान जारी छ।

मधेश प्रदेश प्रहरी प्रमुख उमा चतुर्वेदीले जानकारी दिएकी छन्, “उनी अहिले फरार छन्। सीमाना नाकामा कडाइ गरिएको छ र खोजी कार्य तीव्र पारिएको छ।”