अमेरिकाको न्यूयोर्क शहरको म्यानह्याटनस्थित मिडटाउन क्षेत्रमा सोमबार राति भएको गोलीकाण्डमा एक प्रहरी अधिकृतसहित चार जनाको मृत्यु भएको छ।
घटना ३४५ पार्क एभेन्यू मा अवस्थित ६३४ फिट अग्लो गगनचुम्बी भवनभित्र भएको हो। यही भवनमा नेशनल फुटबल लिग (NFL) र ब्ल्याकस्टोन जस्ता प्रतिष्ठित कर्पोरेट अफिसहरू रहेका छन्।
न्यूयोर्क प्रहरी विभागका अनुसार संदिग्ध आक्रमणकारी २७ वर्षीय युवक हुन्, जसको स्थायी ठेगाना लस भेगास रहेको प्रारम्भिक अनुसन्धानबाट खुलेको छ।
प्रहरीले सार्वजनिक गरेको एक फोटोमा उनी लामो बन्दुक बोकेर भवनभित्र पसेको देखिन्छन्। गोली प्रहारपछि उनले आफूलाई पनि गोली हानेर आत्महत्या गरेका थिए।
प्रहरीले घटनास्थलमा तुरुन्तै पुगेर अवस्था नियन्त्रणमा लिएको थियो। तर उक्त हमलामा एकजना प्रहरी अधिकृतसहित अन्य तीन व्यक्तिको ज्यान गएको पुष्टि गरिएको छ।
घटनाको अनुसन्धान जारी छ भने मृतकहरूको विस्तृत पहिचान सार्वजनिक गरिन बाँकी छ।
‘गन भायोलेन्स आर्काइभ’ का अनुसार, यो अमेरिका भित्र सन् २०२५ को २५४ औं सामूहिक गोलीकाण्ड हो। यस्ता घटनाले अमेरिकामा हतियार नियन्त्रण सम्बन्धी बहसलाई फेरि सतहमा ल्याएको छ।
थप विवरण आउन बाँकी रहेको जनाइएको छ।
