सिन्धुलीको गोलन्जोर गाउँपालिका–६ स्थित छेत्पा नजिकैको भण्डास बिप्पर कटेरीमा बसोबास गर्दै आएका उर्मिला हायूको परिवार अन्ततः पोखरामा फेला पर्यो । एकै परिवारका १६ जना बेपत्ता भएको खबर सोमबार बिहान बाहिरिएसँगै खोजीमा जुटेको प्रहरी टोलीले उनीहरूलाई पोखराको गगनगौँडामा फेला पारेको थियो ।
जिल्ला प्रहरी कार्यालय कास्कीका प्रमुख एसपी श्यामबाबु ओलियाका अनुसार, पोखरा महानगरपालिका–३० स्थित स्थानीय चन्द्र भण्डारी र सोमनाथ पौडेलको घरमा उनीहरू बाँडिएर बसेको अवस्थामा भेटिएका हुन्।
शुक्रबार घरबाट निस्केका उनीहरू शनिबार नै पोखरा पुगेका थिए। सो दिन उनीहरूले लेकसाइडस्थित होटल जननीमा तीनवटा कोठा लिएर एक रात बिताएको होटल सञ्चालक सुनिल भूर्तेलले जानकारी दिए। आइतबार बिहान उनीहरू होटलबाट निस्किएका थिए।
हायू परिवार सोमबार साँझ गगनगौँडामा फेला परेपछि अहिले इलाका प्रहरी कार्यालय सिसुवाको सम्पर्कमा राखिएको छ। प्रहरीले उनीहरूसँग सोधपुछ गरिरहेको छ।
प्रहरीका अनुसार, परिवारका सबै सदस्यहरू पोखरा आफूखुसी आएको र अब सिन्धुली फर्कन नचाहेको बताएका छन्। घरमा बिरामी परिराख्ने, केटाकेटी बिरामी हुने र धामीले पनि नबस्न भनेको जनाउँदै उनीहरूलेथाकथालो छोडेको बताएका छन् ।
“हामी बिरामी भइरहन्थ्यौं, अस्पताल टाढा थियो, चामल ल्याउन पनि २४ घण्टा लाग्थ्यो। यस्तो कठिनाइका कारण नयाँ ठाउँ खोज्दै पोखरा आएका हौं,” प्रहरीसमक्ष उनीहरूले भनेको स्रोतले जनाएको छ।
उनीहरूले अब पोखरामै बस्न पाउने वातावरण मिलाइदिन आग्रह गरेका छन्।“हामी अब सिन्धुली फर्किंदैनौं, जे पर्ला पर्ला भन्दै यहाँसम्म आएका हौं,” एक सदस्यको भनाइ उद्धृत गर्दै एसपी ओलियाले बताए।
उनीहरूले ज्यामी कामको खोजीमा रहेको जनाउँदै भण्डारी र पौडेलको घरमा बास मागेको खुलेको छ।
जिल्ला प्रहरी कार्यालय कास्कीले जिल्ला प्रहरी कार्यालय सिन्धुलीसँग समन्वय गरी परिवारको अवस्थाबारे थप निर्णय लिने तयारी गरिरहेको जनाएको छ।
उर्मिला हायूसहित परिवारमा उनकी छोरी कमला, पूर्ण हायू, बुहारी कोमल माया, छोरीहरू उषा, अस्मिता, शान्ता, ओमकुमारी, छोराहरू राजु, हिमाल, लालबहादुर, बेगबहादुर, सुवर्ण, लक्की तथा नातिनी रियासा र नाती अर्जुन छन्।
