चार दिनदेखि बेपत्ता रहेका सिन्धुलीको गोलन्जोर गाउँपालिका–६ छेत्पाका हायू परिवारका १५ सदस्य पोखरामा सुरक्षित अवस्थामा फेला परेका छन्। उनीहरू पोखरा–३२, गगनगौंडास्थित चन्द्र भण्डारी र सोमना पौडेलको घरमा बाँडिएर बसेको अवस्थामा प्रहरीले फेला पारेको हो।

जिल्ला प्रहरी कार्यालय कास्कीका प्रमुख एसपी श्यामबाबु ओलियाका अनुसार उनीहरूलाई इलाका प्रहरी कार्यालय शिशुवा लगेर थप अनुसन्धान अघि बढाइएको छ। प्रारम्भिक बयानमा उनीहरूले सामाजिक भत्ता लिएपछि मजदुरी गर्न पोखरा आएको बताएका छन्। कम्तीमा १५ दिन बस्ने योजनासहित सिन्धुलीबाट गाडी रिजर्भ गरेर पोखरा आएको खुलेको छ।

शनिबार उनीहरू लेकसाइडको होटेल जननीमा तीन वटा कोठा लिएर बसेका थिए। आइतबार चेकआउट गरेर स्थानीयको घरमा बस्न गएका थिए।

बेपत्ता भएको समाचार बाहिरिएपछि काठमाडौंमा रहेकी माइली छोरी सुजाता हायूले प्रहरीसँग सम्पर्क गरेकी थिइन्। उनले आफू श्रीमान्सहित काठमाडौंमै बसिरहेको जानकारी गराएकी थिइन्।

५२ वर्षीया उर्मिला हायूका १६ जनाको परिवार बिहीबार सुँगुर काटेर भोज गरेपछि सम्पर्कविहीन भएको थियो। उनीहरूको एकान्त घरमा आगो निभाइएको भान्सा, खुल्ला गोठ र भोकले कराउने पाडी भेटिएपछि खोजी अभियान तीव्र पारिएको थियो।

वडाध्यक्ष रविनकुमार श्रेष्ठका अनुसार सम्पर्कविहीन हुनुअघि हायू परिवारले आर्थिक वर्ष ०८१/८२ को अन्तिम किस्तास्वरूप तीन महिनाको सामाजिक सुरक्षा भत्ता—जम्मा १ लाख ९१ हजार ५ सय २० रुपैयाँ बुझेका थिए। परिवार ऋणमा डुबेको र त्यसपछि अचानक घर छाडेको स्थानीयले बताएका छन्।

अहिले प्रहरीको अनुसन्धानपछि मात्रै उनीहरू किन बेपत्ता भए, पोखरा किन पुगे भन्ने यथार्थ खुल्नेछ।