सर्लाहीको ब्रहम्पुरी गाउँपालिका–७ मोहनजंगस्थित सडकमा स्कुल बसको च्यापिएर एक बालिकाको मृत्यु भएको छ। ईश्वरपुर नगरपालिका–१ चौलिखास्थित टेमुको एकेडेमी स्कुलको बसले ठक्कर दिँदा पाँच वर्षीया आशिका महतोको ज्यान गएको हो।
प्रहरीका अनुसार मृतक बालिका सोही स्कुलमा अध्ययनरत थिइन्। उनी ब्रहम्पुरी–७ का रमेश महतोकी छोरी हुन्। स्कुल बसबाट झर्ने क्रममा बसको पछाडिको चक्काले च्यापिँदा उनको टाउकोमा गम्भीर चोट लागेको थियो।
घाइते बालिकालाई तुरुन्तै उपचारका लागि जीवन नारायण अस्पताल, बयलबास लगिएको थियो। तर, चिकित्सकले दिउँसो ४ बजेर ४० मिनेटमा उनलाई मृत घोषणा गरेका थिए।
हाल मृतकको शव पोस्टमार्टमका लागि मलंगवा अस्पतालमा राखिएको छ। दुर्घटनासम्बन्धी थप अनुसन्धान भइरहेको जिल्ला प्रहरी कार्यालय सर्लाहीले जनाएको छ।
