सिन्धुलीको गोलन्जोर गाउँपालिका–६ छेत्पाबाट एकै परिवारका १६ जना बेपत्ता भएको घटनामा काठमाडौंमा बस्दै आएकी माइली छोरी सुजाता हायू प्रहरी सम्पर्कमा आएकी छन्।

जिल्ला प्रहरी कार्यालय सिन्धुलीका प्रमुख एसपी लालध्वज सुवेदीका अनुसार सुजाता हायू र उनका श्रीमान् आयुष श्रेष्ठले आफुहरू काठमाडौंमै बस्दै आएको र बेपत्ता भएकाहरूको खोजीमा सघाउने बताएका छन्।

बेपत्ताको सूचीमा सुजाताको नाम पनि समावेश गरिएको थियो। तर, प्रहरी अनुसन्धानका क्रममा उनी केही महिनाअघि नै काठमाडौं सरेर बसेको खुल्न आएको छ। स्थानीयले अनजानमै उनलाई पनि बेपत्ता सूचीमा राखेको प्रहरीको भनाइ छ।

एसपी सुवेदीका अनुसार, सुजाताले आफू पनि आफ्ना परिवारसँग सम्पर्कमा नआएको बताउँदै खोजी गरिदिन प्रहरीसँग अनुरोध गरेकी छन्।

स्मरण रहोस्, सोही परिवारका १६ जना साउन ११ गतेदेखि सम्पर्कविहीन छन्। उनीहरू सामूहिक रूपमा बेपत्ता भएपछि प्रहरीसहित स्थानीयस्तरमा खोजी भइरहेको छ।