रुपन्देहीको तिलोत्तमास्थित डिङ्गरनगर दूरगामी बहुउद्देश्यीय सहकारीका अध्यक्ष घनश्याम तिवारी लुकेको आशंकामा पीडित बचतकर्ताहरूले ड्राइभरटोलमा रहेको तिवारीकी दिदी माया भट्टराईको घरमा रातभर धर्ना दिएका छन्। धर्ना आइतबार राति ११ बजेदेखि सुरु भई सोमबारसम्म जारी रह्यो।

अध्यक्ष तिवारी र सचिव रामबहादुर थापा एक साता अगाडि देखि फरार छन्। उनीहरूविरुद्ध रुपन्देही जिल्ला अदालतले पक्राउ पुर्जी जारी गरिसकेको छ। तर, प्रहरीले पक्राउ गर्न ढिलाइ गरिरहेको पीडितहरूको आरोप छ।

पीडितहरूले नगरप्रमुख रामकृष्ण खाँणमाथि पनि संरक्षणको आरोप लगाएका छन्। खाँणले ‘मिलेर अघि बढ्न’ सुझाव दिएपछि उनीहरू निराश बनेका हुन्।

प्रारम्भिक लेखापरीक्षणअनुसार सहकारीबाट १ अर्ब रुपैयाँभन्दा बढी अपचलन भएको देखिएको छ। सफ्टवेयरमा व्यापक हेरफेर, नक्कली ऋण प्रवाह, धितोबिनाको ऋण, सेवा शुल्क नलिएको लगायतका अनियमितता भेटिएको छ।

प्रहरीले हाल सहकारी व्यवस्थापक वसन्त पराजुलीलाई पक्राउ गरेर अनुसन्धान गरिरहेको छ। अध्यक्ष र सचिव भने अझै फरार छन्। पीडितहरू दोषीलाई कारबाही गरी रकम फिर्ता गराउन माग गर्दै संघर्षमा छन्।

Ask ChatGPT