सिन्धुलीको कमलामाई नगरपालिका–५ का ५२ वर्षीय त्रिलोचनराज घिमिरे चितवनको देवघाटस्थित पुलबाट हाम फालेर बेपत्ता भएका छन्।

उनले शुक्रबार दिउँसो देवघाटस्थित पुलबाट हाम फालेको प्रहरीले जनाएको छ। घटना भएको तीन दिन बितिसक्दा पनि उनको अवस्था अज्ञात छ।

जिल्ला प्रहरी कार्यालय चितवनका एसपी गोविन्द पुरीका अनुसार, घटनापछि सशस्त्र प्रहरी र नेपाल प्रहरीको टोलीले बोटिङसहित खोजी कार्य जारी राखेको छ। तर, नारायणी नदीको तीव्र बहावका कारण खोजीमा कठिनाइ भइरहेको बताइएको छ।

प्रहरीको प्रारम्भिक अनुसन्धानअनुसार, घिमिरे पूर्वयोजनासहित देवघाट गएका थिए। शुक्रवार बिहान सिन्धुलीस्थित आफ्नो फलफूल पसल खोलेर उनले बलेरो जिप बुक गरी देवघाट पुगेका थिए।

देवघाट पुगेपछि उनले वृद्धाश्रम, गुरुकुल र भक्तजनका लागि भोजनको व्यवस्था गरेका थिए।
रोटरी करुणालय वृद्ध सदाव्रतका लेखा प्रमुख विष्णु सापकोटासँग सम्पर्क गरेर उनले बिहान र साँझको खानाको खर्च समेत आफ्नो नामबाट खुवाइदिन भनेका थिए।

उक्त दिन साँझ ४ बजे नै भोजन खुवाइदिन आग्रह गरेका घिमिरे आफैं भने त्यतिबेला आश्रममा उपस्थित थिएनन्।
तर, टेलिफोनमार्फत सापकोटासँग कुरा गरी भोजन खुवाइए/नखुवाइएकाे जानकारी लिएका थिए।

घटनाअघि उनले श्रीमतीलाई पनि फोन गरेका थिए। प्रहरीका अनुसार, उनले श्रीमतीलाई आफू देवघाटबाट देहत्याग गर्न लागेको बताएका थिए। साथै आफूले लगाएका औंठी र सिक्री घरमा राखेको जानकारी पनि दिएका थिए।

केही समयपछि उनले देवघाटको पुलमै मोबाइल छाडेर नारायणी नदीमा हाम फालेका थिए।

त्रिलोचन घिमिरेका परिवारजन, श्रीमती र छोरा पनि देवघाटमै बसेर खोजीमा सहयोग गरिरहेका छन्।
प्रहरीले सिन्धुलीदेखि चितवनसम्मको यात्राबाटै पूर्वयोजना भएको आशंका गर्दै अनुसन्धान अघि बढाएको छ।

उनका आफन्तका अनुसार, घिमिरेको कुनै मानसिक समस्या वा पारिवारिक मनमुटाव देखिएको थिएन। तर पनि उनी किन यस्तो निर्णयमा पुगे भन्नेबारे प्रस्ट तथ्य खुल्न बाँकी छ।