लागुऔषध कारोबारीलाई समात्ने प्रयासमा दाङको तुलसीपुरमा एक प्रहरी गम्भीर रूपमा घाइते भएका छन्। इलाका प्रहरी कार्यालय तुलसीपुरका बरिष्ठ हवल्दार देव बहादुर बराइली आइतबार दिउँसो मोतिपुरस्थित जंगलमा चलाइएको प्रहरी अपरेसनमा घाइते भएका हुन्।

इलाका प्रहरी कार्यालय तुलसीपुरका प्रमुख डिएसपी अनिल ठकुरीका अनुसार, लागुऔषध कारोबार भइरहेको भन्ने गोप्य सूचनाका आधारमा सादा पोशाकमा खटिएका बराइलीसहितको टोली दिउँसो करिब २:३० बजेतिर मोतिपुर पुगेको थियो।

प्रहरीका अनुसार, भिरालो जंगलको बीचमा तीन जना लागुऔषध कारोबारीहरू ‘ब्राउन सुगर’ बिक्री गर्दै थिए। प्रहरी टोलीले उनीहरूलाई रंगेहात समाउने प्रयास गर्दा एकजना फरार भए भने बाँकी दुईजनाले केही लागुऔषध फालेर केही मुखमै हालेर भिरबाट हाम फाले।

उनीहरूलाई नछाड्ने अठोटसाथ बरिष्ठ हवल्दार बराइली पनि उनीहरूकै पछि भिरबाट हाम फाले। दुईजनालाई तत्काल समात्न सफल भए पनि गम्भीर चोट लागेका कारण बराइली उठ्न नसक्दा दुबैजना भाग्न सफल भएका थिए।

एकजना भने पक्राउ परेका छन्। उनको साथबाट केही परिमाणमा लागुऔषध पनि बरामद गरिएको प्रहरीले जनाएको छ। फरार दुईजनाको खोजी कार्य जारी रहेको र सबैलाई पक्राउ गरेपछि मात्र पहिचान सार्वजनिक गरिने प्रहरीको भनाइ छ।

बरिष्ठ हवल्दार बराइलीको खुट्टाको लिगामेन्टमा चोट देखिएकोले अहिले चिकित्सकको सल्लाहअनुसार घरमै आराम गरिरहेका छन्। लामो समयदेखि तुलसीपुर क्षेत्रमा कार्यरत बराइली लागुऔषध कारोबार, चोरी, लुटपाट, हतियार आक्रमणलगायतका घटनामा संलग्नलाई पक्राउ गर्ने अभियानमा अग्रपङ्क्तिमा रहँदै आएका छन्।

उनको ईमानदारिता, साहस र समर्पणका लागि प्रहरी संगठनबाट पटक–पटक सम्मानित र पुरस्कृत भइसकेका छन्। ‘देब बराइली आएपछि अपराधी डराउँछन्’ भन्ने चर्चा तुलसीपुरमा सामान्य भएको छ।