दुबईमा रहेका देवर अपहरणमा परेको भन्दै ह्वाट्सएपमार्फत धम्की दिएर एक महिलाबाट ८० हजार रुपैयाँ असुलिएको छ।

काठमाडौं उपत्यका अपराध अनुसन्धान कार्यालयका अनुसार, पीडित महिलालाई अपरिचित नम्बरबाट ह्वाट्सएपमा सम्पर्क गरी ‘तिम्रो देवर दुबईमा अपहरणमा परेको छ, तत्काल पैसा नपठाए ज्यान खतरामा पर्छ’ भन्दै आतङ्कित बनाइएको थियो।

कार्यालयका प्रवक्ता प्रहरी उपरीक्षक काजीकुमार आचार्यका अनुसार अपहरणकारीको धम्की र त्रासका कारण महिलाले दुई पटकमा गरी ८० हजार रुपैयाँ पठाएकी थिइन्।

‘अपहरणकारी’ले महिलालाई फोनसमेत राख्न नदिई निरन्तर धम्की दिएकाले उनले कसैसँग सल्लाह गर्ने मौकासमेत पाइनन्। ‘फोन राखे तिम्रो देवर बाँच्दैन’ भन्ने धम्कीपछि उनी रकम पठाउन बाध्य भइन्।

रकम पठाइसकेपछि देवरसँग सम्पर्क गर्दा मात्र आफू ठगिएको थाहा पाएपछि उनी साइबर ब्युरोमा उजुरी दिन पुगेकी थिइन्।

यस घटनामा प्रहरीले अनुसन्धान अगाडि बढाएको आचार्यले जानकारी दिए।