शनिबार बिहानैदेखि काठमाडौं उपत्यकाको मौसममा उल्लेख्य परिवर्तन देखिएको छ। बिहानैदेखि आकाश धमिलो देखिन थालेपछि उपत्यकाका विभिन्न स्थानहरूमा छिटपुट रुपमा पानी परेको छ। मौसम पूर्वानुमान महाशाखाका अनुसार आज दिनभर उपत्यकाको मौसम बदलीकै अवस्थामा रहनेछ भने केही स्थानमा हल्का वर्षा पनि हुन सक्ने सम्भावना छ।
महाशाखाका मौसमविद् मीनकुमार अर्यालयका अनुसार शनिबार बिहानदेखि नै उपत्यकाको आकाशमा बादल मडारिएको छ र कतिपय ठाउँमा पानी पनि छिटिएको छ। उनले भने, “आज ठूलो पानी पर्ने सम्भावना भने देखिँदैन तर मौसम भने दिनभर बदली रहनेछ। उपत्यकाका केही स्थानमा हल्का वर्षा हुन सक्छ।”
मौसम बद्लिँदा दैनिक कार्यमा हिँडडुल गर्ने नागरिकहरू प्रभावित हुने देखिन्छ। बिहानैदेखि सूर्यको झल्को नदेखिनुले तापक्रम केही घटेको महसुस पनि भइरहेको छ। विशेषगरी कार्यालय जाने समय र बिहानका नियमित गतिविधिहरूमा बादली मौसमले प्रभाव पारेको देखिन्छ।
मौसमविद्हरूका अनुसार अहिले नेपालको मध्य र पूर्वी भू-भाग नजिकै विकसित भएको न्यून चापीय प्रणालीको प्रभावले गर्दा मौसम बद्लिएको हो। यो प्रणालीले विशेषगरी मध्यम पहाडी क्षेत्रहरूमा बदली र हल्का वर्षा गराउने सम्भावना देखाइएको छ। यद्यपि, यो प्रणाली धेरै सक्रिय नभएकाले भारी वर्षाको सम्भावना भने नरहेको महाशाखाले स्पष्ट पारेको छ।
मौसमी प्रभावका कारण काठमाडौं उपत्यकामा आजको न्यूनतम तापक्रम २० देखि २२ डिग्री सेल्सियस र अधिकतम तापक्रम २८ देखि ३० डिग्री सेल्सियससम्म पुग्ने अनुमान गरिएको छ। आर्द्रता भने अन्य दिनको तुलनामा केही बढी हुने भएकाले मानिसहरूले गह्रौँपन र असजिलो महसुस गर्न सक्छन्।
महाशाखाले यस्तो मौसममा अनावश्यक घरबाहिर ननिस्कन र निस्कनै परेमा छाता वा रेनकोट साथमा राख्न सुझाव दिएको छ। साथै, मोटरसाइकल वा साना सवारी साधन प्रयोग गर्दा सतर्कता अपनाउन र फोहोर पानीको जमावट हुने स्थानमा नहिड्न समेत महाशाखाले आग्रह गरेको छ।
बर्खाको याम चलिरहेको अवस्थामा मौसमको अचानक परिवर्तन सामान्य हो। त्यसैले नागरिकहरूले समय-समयमा मौसमको पूर्वानुमान चासोका साथ हेर्नु आवश्यक छ, ताकि दैनिक जीवनमा अनावश्यक असहजता नहोस्।
प्रतिक्रिया
सम्बन्धित खवर
