भारतको विश्वविद्यालय अनुदान आयोग (यूजीसी) द्वारा गठित जाँच बुझ समितिले भारतको उडिशा राज्यको भुवनेश्वरस्थित केआईआईटी विश्वविद्यालयलाई वर्षको सुरुमा दुई विद्यार्थीको आत्महत्याको लागि जिम्मेवार ठहराएको टाइम्स आफ इन्डियाले जनाएको छ ।
दुईमध्ये एक बीटेक तेस्रो वर्षकी नेपाली विद्यार्थी प्रकृति लम्साल फेब्रुअरी १६ मा आफ्नो छात्रावासको कोठामा मृत फेला परेकी थिइन् ।
जाँचबुझ समितिले आफ्नो प्रतिवेदनमा विश्वविद्यालयको गैरकानुनी र अवैध गतिविधिले एक विद्यार्थीको मृत्यु निम्त्याएको र प्रशासनको कार्य फौजदारी अपराध बराबर भएको दाबी गरेको समाचारमा उल्लेख छ ।
प्रकृतिले आत्महत्या गर्नु भन्दा धेरै अघि प्रशासनलाई दुई पटक उजुरी गरेकी थिइन् । तर दुवै उजुरीहरूमा उनीहरूले गैरकानुनी सम्झौताको लागि निर्णय गरेको प्रतिवेदनमा उल्लेख गरिएको छ । विश्वविद्यालयसँग पहिलो उजुरी दर्ता हुँदा नै केटालाई सजाय दिने अधिकार भए पनि सजायको सट्टा, उनीहरूले केटीलाई जबरजस्ती गैरकानुनी सम्झौता गर्न बाध्य पारेर केटाको पक्ष लिएको पनि प्रतिवेदनमा दाबी गरिएको छ ।
सोही कारणले आत्महत्या निम्त्याएको बताउँदै आत्महत्या टार्न सकिने समितिको प्रतिवेदनमा उल्लेख भएको समाचारमा बताइएको छ ।
समितिले निष्कर्षहरूसँगै कडा सिफारिसहरू पनि गरेको बताइएको छ । जसमा आयोगले विश्वविद्यालयको विस्तारमा रोक लगाउने र गल्ती गर्ने अधिकारीहरूमाथि विभागीय कारबाही गर्नुपर्ने लगायतका कदमहरू भएको बताइएको छ ।
प्राध्यापक नागेश्वर रावको अध्यक्षतामा गठन भएको समितिले क्याम्पस भ्रमण गरेर सरोकारवालाहरूसँग अन्तर्क्रिया र विस्तृत विश्लेषणपछि मे २०, २०२५ मा आफ्नो प्रतिवेदन पेस गरेको थियो ।
